सभामुख अग्निप्रसाद सापकोटाया २०६८ सालय् दायर याउगु मुद्दा सर्वोच्च अदालतय् थौं बुधबाः न सुनुवाइ जुइ मफुत।

सूचना तथा सञ्चार मन्त्री जुगु इलय् सापकोटां पत्रकार कनकमणि दीक्षितविरुद्ध दायर याउगु अदालतया अवहेलना मुद्दा बुधबाः प्रधानन्यायाधीश चोलेन्द्रशम्शेर जबरा, न्यायाधीशपि दीपककुमार कार्की, मीरा खड्का, हरिकृष्ण कार्की व ईश्वर प्रसाद खतिवडा दुगु संवैधानिक इजलासय् तोके याउगु खः। तर उगु मुद्दा न्यायाधीश हरिकृष्ण कार्की स्वये मिले मजुगु धासे सुनुवाइ जुइ मफुगु धका सर्वोच्च अदालतया छम्ह अधिकारीं जानकारी बिउगु दु।

न्यायाधीश कार्की न न्हापा कानुन व्यवसायी जुगु इलय् थुगु मुद्दाय् बहस याउगु खः। उकिइ कार्कीया स्वार्थ ल्वायेफु धासे बुधबाः संवैधानिक इजलासं उगु मुद्दा स्वयेमिले मजु धका उम्ह अधिकारीं जानकारी बिउगु खः। थ्व स्वया न्ह्यः १६ भदौय् न थुगु मुद्दा प्रधानन्यायाधीश चोलेन्द्रशम्शेर जबरा, न्यायाधीशपि दीपककुमार कार्की, मीरा खड्का, हरिकृष्ण कार्की व ईश्वरप्रसाद खतिवडा दुगु संवैधानिक इजलासय् तःगु खः।

उगु इलय् न स्वये मिले मजु धका सुनुवाइ स्थगित याउगु खः। झण्डै हाकन लच्छि लिपा इजलासय् उगु मुद्दाय् पेशी तःगु दु।

Categorized in राष्ट्रिय