ओमनयात बुकुसें नेपाल आईसीसी विश्वकप लिग–२ क्रिकेटया प्यंगूगु थासय्
ञंलाथ्व चतुर्दशी ११४१, असोज ४ सोमबाः
![](https://www.lahananews.com/sites/default/files/nepl.jpg)
त्रिकोणात्मक एकदिवसीय श्रृंखलाया लिपांगु कासाय् नेपालं ओमानयात ७गू विकेटं बुकूगु दु ।
आईसीसी विश्वकप लिग–२ क्रिकेट अन्तर्गत ओमानय् जूगु श्रृंखलाय् नेपालं निक्वःखुसि त्याकूगु खः । नेपालं श्रृंखलाय् ब्वति काःगु मेगु निगू पुचः ओमान व अमेरिकानाप छगू कासा त्याकूगु खःसा मेगु कासा बूगु खः ।
अल अमेरात क्रिकेट मैदानय् म्हिगः न्हापां व्याटिङ याःगु ओमानं ३७गू ओभर १गः बलय् अलआउट जुसें सछि व २१गू रन दयेकूगु दु । ओमानया नितिं कप्तान जिशन मक्सुदं दकले उप्वः ४१गू रन दयेकूगु दु ।
ओमानयात अःपुक्क कःघायेत नेपाःया करण केसी व सन्दीप लामिछानें ४गू÷४गू विकेट काःगु दु । शरद भेषवाकरं २गू विकेट काःगु दु । लिसलय् सछि व २२गू रनया लक्ष्य ल्यूगु नेपालं १८गू ओभर २गः बलय् ३गू विकेटया क्षतिइ पूरा याःगु खः ।
नेपालं कासा त्याकूबलय् कप्तान ज्ञानेन्द्र मल्लं अविजित ५२गू रनया योगदान याःगु खः । मल्लया निगूगु विकेटया नितिं आसिफ शेखनाप ९५गू रनया कीर्तिमानी साझेदारी याःगु खः । नेपाःया एकदिवसीय अन्तराष्ट्रिय कासाय् आःतक विकेटया नितिं जूगु थ्व उच्च साझेदारी खः ।
ओपनर आसिफं ४०गू रन दयेकूगु दु । थ्व कासा त्याकाः नेपाः विश्वकप लिग–२ क्रिकेटया प्यंगूगु थासय् थ्यंगु दु । नेपाःया ८गू कासापाखें ८गू हे ल्या दु । १३गू कासाय् २०गू ल्या दयेकूगु ओमान दकले न्ह्यःनय् थ्यंगु दु । अमेरिका १५गू कासाय् १४गू ल्या दयेकाः निगूगु थासय् थ्यंगु दु ।
Categorized in कासा