थौं येँयाःया झ्वलय् क्वःनेयाः
लहनान्युज | ञंलाथ्व चतुर्दशी ११४१, असोज ३ आंईतवाः
थौं स्वनिगःया ऐतिहासिक येँयाःया झ्वलय् क्वःनेयाः । येँया क्वःने लागाय् कुमारीलिसें गणेश व भैरवया रथ सालाः क्वःनेयाः हनेत्यंगु दु ।
थौैंया दिनय् रथ साले न्ह्यः बसन्तपुरलिइ राष्ट्रप्रमुखं सद्यः कुमारी, गणेश व भैरवया दर्शन यायेगु परम्परा दु । येँयाःया हे झ्वलय् लाखय्, पुलुकिसि, सवःभकु नं पिकोगु चलन दु । थुकथं लाखय्, पुलुकिसिलिसें कुमारी, गणेश व भैरवया रथ बसन्तपुलिं सालाः थौं मरु, चिकंमुगः, न्हूघः, लगं, ह्यूमत, क्वहितिं मरु जुयाः बसन्तपुलिइ हे थ्यंकेधुंकाः याः न्याइ ।
कन्हय् धाःसा येँया थःने लागाय् रथ साली । कन्हय् येँयाःपुन्हिया दिनय् दक्वं नेवाःतय् समयबजि दयेकाः नयेगु लिसें इनेगु नं याइ । येँयाःपुन्हिया दिनय् समयबजिया विशेष महत्व दुगु जूगुलिं समयबजि पुन्हि तकं धायेगु याः । दँय्दसं भाद्र शुक्ल चतुर्दशीया दिनय् स्वनिगःया येँ, यल, ख्वपलिसें धौख्यः व दोलखाय् नं येँयाः हनेगु याइ ।
भाद्र शुक्ल द्वादशीया दिनय् हनुमानध्वाखाया न्ह्यःने धार्मिक विधि कथं इन्द्रध्वजालिसेंया यःसिँ थनेधुंकाः येँयाः औपचारिक रुपं न्ह्याइ । वयां न्ह्यः तान्त्रिक विधि कथं पूजा यानाः काभ्रेया नालास्थित चित्तपोल जङ्गलं यःसिँया नितिं सिमा पालाः हइ । लिच्छवीकालनिसें थुगु जात्रा हनेगु न्ह्याःगु धयावःगु दुसा जय प्रकाश मल्लया पालय् कुमारीया रथ जात्रा न्ह्याकूगु खः ।
विशेष यानाः स्वनिगःया नेवाः समुदायं वा व सहकालया द्यः इन्द्रया पूजा–आराधना यानाः थुगु जात्रा हनेगु याइ ।
Categorized in राष्ट्रिय
