च्याम्पियन्स लिग फुटबल सुरु
ञंलाथ्व नवमी ११४१, भाद्र ३० बुधवाः
![](https://www.lahananews.com/sites/default/files/champin%201.jpg)
युएफा च्याम्पियन्स लिग फुटबल धेंधें बल्लाःया न्हूगु सिजन वंगु चान्हय्निसें न्ह्याःगु दु । न्हूगु सिजनया न्हापांगु कासाय् इंग्लीश क्लब चेल्सी त्याःबलय् म्यान्चेस्टर युनाइटेड बूगु दु ।
पुचः ‘एच’ या कासाय् चेल्सीं रुसया जेनिथयात १–० गोलं बुकल । चेल्सीया लागिं रोमेलु लुकाकुं निर्णायक गोल यात । थ्व हे पुचःया मेगु कासाय् इटालीया युभेन्टसं स्विडेनया माल्मोयात ३–० गोलं बुकल ।
उखे, पुचः ‘एफ’ या कासाय् इंग्लीश क्लब म्यान्चेस्टर युनाईटेडयात स्विटजरल्याण्डया योङ ब्वाइजं २–१ गोलं बुकूबलय् इटालीया एटलान्टा व स्पेनया भियारियालं २–२ गोलया ज्वलिंज्वः म्हितल ।
पुचः ‘इ’ या जर्मनीया बायर्न म्युनिखं स्पेनया बार्सिलोनायात वयागु हे ख्यलय् ३–० गोलं बुकूबलय् युक्रेनया डाइनामो किभ व पोर्चुगलया बेनिफिकां गोल मजूगु ज्वलिंज्वलय् लुधनेमाल ।
पुचः ‘जि’ या कासाय् अष्ट्रियाया साल्जवर्गं स्पेनया सेभियालिसे १–१ गोलया ज्वलिंज्वः म्हितूबलय् फ्रान्सया लिललिसे जर्मनीया उल्फवर्गं गोल मजूगु ज्वलिंज्वः यात ।
Categorized in कासा