एमाले १४म्ह सांसदपिन्त कारबाही याउगु सर्वोच्चं स्वयमलात
लहनान्युज | ञंलाथ्व सप्तमी ११४१, भाद्र २८ सोमवाः
माधवकुमार नेपालनाप १४ म्ह सांसदपिन्त याउगु कारबाही कार्यान्वयनया माग यासे नेकपा एमालेया अध्यक्ष केपी शर्मा ओलीं दायर याउगु रिट ‘हेर्न नभ्याइने’ सूचीइ तःगु दु।
न्यायाधीशपि दीपककुमार कार्की व मीरा खड्काया इजलासय् वंगु रिट थौं सर्वोच्चया बेन्च–बार समन्वयया बैठक जूगुलि स्वय मलाउगु सूचीइ तःगु धका सर्वोच्च अदालतं धाउगु दु। ओलीं माधव नेपालनाप १४ म्ह सांसदपिन्त एमाले न याउगु कारबाहीयात वैधानिकता बिया उमित सांसद पद निलम्बन याये माःगु धासे अन्तरिम आदेशया माग यासे सर्वोच्चय् रिट बिउगु खः।
उगु रिटय् निर्वाचन आयोग व सभामुखयात विपक्षी दयकातःगु खः। ओलीं एमालेपाखे कारबाही यापिं १४ सांसदपिन्त निर्वाचन आयोगं अलग दल दर्ताया लागि सनाखत याउगु खः व एमालेपाखे कारबाही याना संसद् सचिवालययात जानकारी बिया न सभामुख अग्निप्रसाद सापकोटां सूचं टाँसय् तक मयाउगु धासे रिट निवेदन बिउगु खः।
अथेहे रिटय् १४ म्ह सांसदपिनिगु ल्हाचिं दुगु न्हुगु दल दर्ता यायेगु निर्वाचन आयोगया निर्णय बदर याये माःगु माग न याउगु खः।
Categorized in राष्ट्रिय
