ख्वप दरवार क्षेत्रय् दुगु लुँध्वाखा दय्कूपिं ‘निवा’ शाक्यतय् ईतिहास कःघानाः च्वयातःगु ‘ख्यपया ‘निवा’ शाक्यतय्गु ईतिहास’ नांया सफू थौं बिमोेचन याःगु दु।

ख्वपया ४ सः दँया इतिहास कःघानातःगु सफू प्राध्यापक सूवर्ण शाक्यं बिमोचन यानादीगु खः। सफू विमोचन ज्याझ्वलय् प्रा. शाक्यं स्वनिगलय् च्वनाच्वंपिं निवा शाक्यतय् इतिहासया बारे नवासें थुगु सफुतिं निवा शाक्यतय् बारे यक्व जानकारी बीगु धयादिल।

ख्वपया खौमायाम्ह आरती गुठी निवा संघया नायः संघरत्न शाक्यं सफू च्वयादीगु खः। सफूया च्वमि शाक्यं सफुतिइ ख्वपया नांजाःगु लुँध्वाखा, ङातापोलाया गजूलिसें थीथी मुर्ति दय्केत ख्वपया निवा शाक्यतय् भूमिका व योगदानया विषयस थीथी प्रमाणया लिधंसा सफुतिइ दुथयकागु धयादिल।

ज्याझ्वलय् त्रिरत्न शाक्य, प्रा. सिद्धिरत्न शाक्य, साहित्यकार तिलक प्रकाश कायस्थ, वौद्ध विद्वान रत्नसुन्दर शाक्यलिसें नं सफुया चर्चा यानादीगु खः।

Categorized in राष्ट्रिय