स्थानीय सरकार अले सहरया अन्तरराष्ट्रिय सञ्जाल एशिया प्यासिफिकया अधिकारीतय्सं महानगरया सहरी व्यवस्थापनय् सहकार्यया इच्छा क्यंगु दु।

शनिबाः सञ्जालया एशिया प्यासिफिक नायः अशोक व्याञ्जु, महासचिव डा. बर्नाडिया इरावती जन्द्रादेवी, येँ महानगरया उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, प्रशासन विभागया प्रमुख महेश काफ्ले, अन्तरराष्ट्रिय सम्बन्ध सचिवालयया प्रमुख डिल्लीराम बास्तोलालिसेंया अधिकारीतय् दथुइ अन्तरदेशीय सहकार्यय् येँ महानगरया विषयस खँल्हाबल्हा जूगु खः।

व झ्वलय् सञ्जालया नायः व्याञ्जुं येँेय् जुइगु अभ्यासं मेथाय् नं लबः दइगु जूगुलिं येँलिसे सहकार्य याय्त स्वयागु धयादिल। व झ्वलय् महानगरया उपप्रमुख खड्गी श्रेष्ठं सञ्जालं सहरी वातावरण सुधारया लागिं मानव मलमुत्र व्यवस्थापनय् याःगु ज्याः थः प्रभावित जुयागु धयादिल । ज्याझ्वलय् प्रमुख प्रशासकीय अधिकृत ज्ञवाली, सञ्जालया महासचिव डा. बर्नाडियां थःथःगु नुगःखँ तयादीग खः।

सञ्जालया ८क्वःगु सम्मेलन भदौ २२ गतेनिसें २४ गतेतक्क येँय् जूगु खः । सम्मेलनय् स्थानीय सरकार प्रमुखपिन्सं कोभिड व्यवस्थापनय् थःपिन्सं यानागु कुतः व आःया हाथ्याया विषयस प्रस्तुति ब्यूगु खः।

सञ्जालय् हलिंन्यंकया २ लाख ४० हजार स्वयां अप्वः सहर व एशिया प्यासिफिक क्षेत्रं ७ हजार स्वयां अप्वः सहर दुजः दु। थुकी येँ महानगरलिसें नेपालया १० पालिका दुजः जुयाच्वंगु दु।

Categorized in राष्ट्रिय