छत्रपाटी चिकित्सालय् न्हूगु भवनया ‘माउ बद्रि भवन’या शिलान्यास
शोभा श्रेष्ठ | ञंलाथ्व चतुर्थी ११४१, भाद्र २५ शुक्रवाः
![](https://www.lahananews.com/sites/default/files/241638695_281948946729849_1043838804363287862_n.jpg)
छत्रपाटी निःशुल्क चिकित्सालय अस्पतालय् न्हूगु भवनया ‘माउ बद्रि भवन’ छगु ज्याझ्वः दथुइ येँ महानगर मेयर विद्यासुन्दर शाक्य व उपमेयर हरिप्रभा खड्गी श्रेष्ठं शिलान्यास यानादिु दु।
उगु भवन शिलान्यासया झ्वलय् महानगर मेयर शाक्यलिसें उप मेयर खड्गी श्रेष्ठ, १७ वडाया वडाध्यक्ष नविन मानन्धर व अस्पतालया अध्यक्ष डा. मनोजमान श्रेष्ठं मंकाः कथं भूमि पुजा यानादीगु खः।
उगु ज्याझ्वलय् न्ववानादीसे मेयर शाक्यं इलय् हे स्तरीय ज्या यायेत इनाप यासें धेबाया चिन्ता मकायेत धयादिल। क्षेत्रपाटीइ १० आना १ दाम जग्गा करीब ३५ करोड तकाया लागतय् अस्पतालया न्हूगु भवन दयेकेत्यंगु खः।
अथेहे ज्याझ्वलय् महानगर उप मेयर खड्गी श्रेष्ठं दक्वं अधिकारमध्ये नं नागरिकयात स्वास्थ्य सम्बन्धी अधिकारया प्रत्याभूति याकेत थःपिन्सं कुतः यानाच्वनागु धयादिल। वडा १७ या वडाध्यक्ष मानन्धरं ०७२ सालया भुखाय्, ०७५ य् डेंगु व आः विश्व महामारी जुयाच्वंगु कोभिड संक्रमणया इलय् चिकित्सालयं स्वास्थ्योपचारय् ब्यूगु योगदानयात च्वछानादिल।
अस्पतालया नायः डा. मनोजमान श्रेष्ठं मेगु वालंनिसें न्हि सच्छि सिलिण्डर अक्सिजन उत्पादन क्षमताया प्लान्ट स्थापना यायेत्यनागु जानकारी बियादिल। अस्पताल निर्माणया न्हापांगु चरणय् १२ करोड तकाया लागतय् भूमिगत १ तलालिसें ७ तलाया भवनया स्ट्रक्चर तयार याइ।उकिया नितिं येँ महानगरं न्हापा हे २ करोड ५० लाख तका उपलब्ध याकेधुंकूगु दु।
आः थप २ करोड ५० लाख तकालिसें महानगरं ५ करोड तका बीगु धाःगु दु।थ्व बाहेक अस्पतालया आन्तरिक आय व दातापिनिगुपाखें चूलाइगु ग्वहालि धेबा छ्यलेगु नायः श्रेष्ठं धयादिल।अस्पतालय् आः २४ घौ हे इमर्जेन्सी, शल्यक्रिया, जनरल वार्ड, आइसीयू, भेन्टिलेटर, प्याथोलोजी ल्याबलिसें दक्वं कथंया सामान्य व विशेषज्ञ स्वास्थ्य सेवा न्ह्यानाच्वंगु दु।
कोभिड संक्रमणया निगूगु लहरया इलय् महानगरं थुगु अस्पतालयात महानगरया कोभिड विशेष अस्पतालया रुपं न्ह्याकूगु खः। २०१७ सालय् राजनीतिक अस्थिरताया इलय् जूगु झडपय् घाःपाः जूपिन्त वासः यायेगुलिइ थुगु चिकित्सालयया तःधंगु भूमिका दु।
Categorized in राष्ट्रिय