जनसेवा सामुदायिक केन्द्र व नव युवा क्लवया मंकाः भवन छगु ज्याझ्वः दथुइ येँ महानगरपालिकाया मेयर विद्यासुन्दर शाक्य र उपप्र मेयर हरिप्रभा खड्गी श्रेष्ठं शिलान्यास यानादीगु दु।

येँ महानगर वडा २० या मरु छासपाक्वः उगु भवन निर्माण यायेत्यंगु खः। उगु भवन निर्माणया लागि १ करोड ४४ लाख २७ हजार ३१० रुपैयाँ लागत अनुमान याना तःगु दु। खुल्ला प्रतिस्पर्धापाखे निर्माण पक्ष छनौट यागुलि सृजना गौत्तम कन्स्ट्रक्सन एण्ड सप्लायर्स प्रा. लि. न ८६ लाख ९८ हजार ३७८ रुपैयाँ निर्माण कवोल सम्पन्न यायेगु कबोल याउगु खः।

वंगु असार २९ गते सम्झौता जुगु भवन निर्माणया ज्या साउन २६ गतेपाखे सुरु जुइ। अथेहे थुगु भवन वइगु दँया (०७९) साउन १५ गते तक निर्माण सम्पन्न यायेमाः।

शिलान्यासलिपा न्ववायेगु झ्वलय् मेयर शाक्यं बर्दी दुपि व  बर्दीविनाया प्रहरीे मंकाः सहभागितां जक समाजय् शान्ति सुरक्षा कायम याये फइ। ‘शान्ति व सुरक्षित समाज दक्कोसिगु चाहना खः।थुगु चाहना पूरायायेत नागरिक व प्रहरीया मंकाः ज्याभ्वः दयेमाः।’ मेयर शाक्यं धयादीगु दु, सहर सुरक्षाया लागि नेपाल प्रहरीनाप व सतक सुरक्षाया लागि ट्राफिक प्रहरीनाप न महानगरं सहकार्य जुयाच्वंगु दु धका धयादीगु दु।

उगु ज्याझ्वलय् येँ महानगर वडा अध्यक्षपि २० या राजेन्द्र मानन्धर, २१ या उदय चुन्दामणि बज्रचार्य, २३ या मचाराजा महर्जन व २७ या चिनियामान बज्राचार्यपिनिगु न उपस्थिति दुगु खः।

Categorized in राष्ट्रिय