सर्वोच्च अदालतं पूर्वप्रधानमन्त्री झलनाथ खनालयात विदेशय् वना उपचार यागु खर्च बिउगु विषय सरकारयात लिखित जवाफ माग याउगु दु।

बुधबाः न्यायाधीश ईश्वरप्रसाद खवितडाया एकल इजलासं सरकारया नामय् कारण देखाउ आदेश जारी याउगु दु। जँलास्ये ल्वचं पीडित पूर्वप्रधानमन्त्री खनालयाते उपचारया लागि तत्कालिन केपी शर्मा ओली सरकारं ३१ लाख रुपैयाँ ग्वाहालि याउगु खः।

भदौ १३ गते विद्यार्थी संगठन अखिल छैठौंया अध्यक्ष नाप अधिवक्ता विमल पोखरेलं विदेशय् वना याउगु उपचार खर्च राज्यकोषपाखे बिइ मजूगु जनस्वास्थ्य ऐन २०७५ विपरीत जुगु धासे प्रधानमन्त्री नाप मन्त्रिपरिषद कार्यालय व झलनाथ खनालयात विपक्षी दयका रिट दायर याउगु खः।

पोखरेलं बिउगु रिटय् खनालयार्त उपचार खर्च उपलब्ध यायेगु निर्णय बदर यासे व उपलब्ध याये धुकुगु रकम झलनाथ खनालपाखे राज्यकोषय् लित बिइत आदेशया माग याउगु खः। जनस्वास्थ्य ऐन २०७५ या दफा ३० नं देय्या नागरिक वा विशिष्ट न्ह्याम्हे जूसा सरकारी सहयोग वा खर्चय् विदेशय् उपचार याये दइगु व्यवस्थायात बन्देज याउगु दु।

पूर्वप्रधानमन्त्री खनालं भारतया एपोलो अस्पतालय् मिर्गौला प्रत्यारोपण याना छु दिं न्ह्यः जक थःगु देय् लिहालःगु खः।

Categorized in राष्ट्रिय