महानगरं फोहोर मुनेगु ज्या न्ह्याकल
लहनान्यूज | गुंलागा दशमी ११४१, भाद्र १६ बुधबाः
येँ महानगरपालिकां थौंनिसें फोहोर मुनेगु ज्या न्ह्याकूगु दु । ल्याण्डफिल्ड साइट जःखःया स्थानीय व येँ महानगरपालिकादथुइ म्हिगः सनिलय् सहमति जुइवं महानगरपालिकां थौं सुथंनिसें फोहोर मुनेज्या न्ह्याकूगु दु ।
वंगु साउनया लिपांगु ईलय् वा वयाः ल्याण्डफिल्ड साइट थ्यंकेगु लँपु अवरुद्ध जुइवं महानगरपालिकां फोहोर ममुंगु खः । उखय् ल्याण्डफिल्ड साइटया स्थानीय मनूतय्सं न थीथी माग तयाः फोहोर वाय्यंकेगु थासय् अवरोध याःगुलिं स्वनिगलय् फोहोरया समस्या जूगु खः ।
थ्वहे हुनिं वाःछि मल्याक ईलंनिसें स्वनिगःया फोहोर ब्यवस्थापनय् समस्या जूगु खः । म्हिगः सनिलय् येँ महानगरपालिकाया वातावरण विभाग व सिसडोलया स्थानीय मनूतदथुइ ९गू बुँदे सहमति जूगु दु ।
महानगरपालिकाया वातावरण विभागया प्रमुख हरिकुमार श्रेष्ठ, सिसडोल इञ्चार्ज सरकारदीप श्रेष्ठ, महानगरीय प्रहरी वृत्त बालाजुया इञ्चार्ज डीएसपी निर्मल बुढाथोकी व नुवाकोटया ककनी गाउँपालिका–१ या वडाध्यक्ष चन्द्र बहादुर श्रेष्ठ बलामीदथुइ ९गु बुँदे सहमति जूगु दु ।
सहमति कथं महानगरपालिकां नुवाकोटया तीनपिप्ले–सिसडोल सडक बाःछिदुने ग्राभेल यानाबीमाः अले कालोपत्रे यायेत थत्थें टेण्डर प्रक्रिया न्ह्याकेमाः ।
अथेहे फोहोर ढुवानी याइगु गाडीइ लिचेड बक्सया व्यवस्था यायेगु, तीनपिप्ले–सिसडोल सडक खण्डय् पार्किङ यायेत अले ओभरलोड ढुवानी यायेमदइगु न सहमति याःगु दु ।
उखय्, सरकारं स्वनिगःया फोहोर ब्यवस्थापनया नितिं दीर्घकालीन योजना अन्तर्गत बञ्चरेडाँडाय् न वइगु शुक्रवाःनिसें फाहोर ब्यबस्थापन याइगु महानगरपालिकां धागु दु ।
आः छुं न कथंया अवरोध मजूसा स्वनिगःया फुक्क फोहोर मुनाः ब्यवस्थापन यायेत लच्छि बीगु महानगरपालिकां धागु दु ।
Categorized in राष्ट्रिय
