कन्ह्यनिसे स्वनिगः दुने फोहोर उठे याइगु जुगु दु। कन्ह्य सुथय् ६ बजे निसे येँं महानगर नाप स्वनिगः दुनेया सतकय् फोहोर उठे यायेत्यंगु खः।

थौं येँ महानगरपालिकाया मेयर विद्यासुन्दर शाक्यया अध्यक्षताय् येँ प्रमुख जिल्ला अधिकारी कालीप्रसाद पराजुली, सतक विभागया महानिर्देशक अर्जुनजङ्ग थापा, प्रहरी वरिष्ठ उपरीक्षक अशोक सिंह लगायत अधिकारीपिनिगु बैठकं थज्यागु निर्णय यागु खः। सतक भाँसे जुया फोहोर यकेत थाकूगुलि भदौ ६ गते ककनी गाउँपालिका वडा १ या छम्ह ७० दँ दुम्ह सीगु खः।

वयकः हैजाया कारण मदुगु धासे स्थानीयपिन्स भदौ १० गतेनिसे साइटय् फोहोर वांछ्वयेत पंगः थंगु खः। हैजा जूगु खःलाः? धका महानगरपाखे सम्भावित थासय् च्वपि न्याम्हेसित व प्यंगु परिवारं त्वनेगु लःया नमुना सङ्कलन यासे राष्ट्रिय जनस्वास्थ्य प्रयोगशालाय् परीक्षण यागु खः। प्रयोगशालापाखे वंगु रिपोर्ट कथे उगु थासय् हैजाया जीवाणु खनेमदुगु धका धागु खः।

‘‘ताःईनिसे फोहोर उठे याये मफया महानगर नाप स्वनिगलय् प्रदूषण अप्वो वंगुलि सरोकारवाला निकाय नाप छलफललिपा फोहोर उठे यायेगु निर्णय यानागु खः,” महानगरपालिकाया मेयर शाक्यं धयादीगु दु, ‘‘स्थानीय समस्या समाधान यायेगु ज्याय् निरन्तर जुगु दु। जिमिसं समाधान यायेत मफुसा समस्या जूसा सम्बन्धित निकाय नाप समाधानया लागि कुतः याये।

तर, ताः ईतक न फोहोर रोके जुया समस्या थपे यायेगु ज्या जुइमखु। स्थानीय जीवन व वातावरणयात असर मजुइगु कथं कन्ह्यनिसे फोहोर संकलन, ढुवानी व अन्तिम व्यवस्थापनया ज्यायात नियमित याये। जिपि स्थानीयपिनिगु जायज माग पूरा यायेत तयार दु।”

उगु बैठकय् काठमाडौँया प्रमुख जिल्ला अधिकारी कालीप्रसाद पराजुलीं, फोहोर व्यवस्थापन ज्याय् अत्यावश्यक सेवा जुगुलि अवरोध जुइ मखु धका धयादीगु खः। फोहोर व्यवस्थापनय् सुरक्षा चुनौती खनेदतकि गृह प्रशासनं समन्वय याना सुरक्षा व्यवस्था मिले याये धका धयादीगु खः।

Categorized in राष्ट्रिय