नेपाःलिसेया मैत्रीपूर्ण कासा म्हितेत भारतीय टोली नेपाः थ्यन
गुंलागा नवमी ११४१, भाद्र १५ मंगलवा
![](https://www.lahananews.com/sites/default/files/india_7.jpg)
नेपालविरुद्ध जुइगु निगू मैत्रीपूर्ण कासाया लागिं भारतीय फुटबल टोली येँय् थ्यंकःवःगु दु । कप्तान सुनिल क्षेत्रीलिसें २५ दुजःया टोली येँयु थ्यंकःवःगु खः ।
नेपाल व भारत दथुइ भदौ १७ व २० गते दशरथ रंगशालाय् मैत्रीपूर्ण कासा जुइ । स्ववाः पोखराय् अभ्यास यानाः नेपाली टोली नं राजधानीइ लिहांवयेधुंकूगु दु । नेपाल व भारत दथुइ ६ दँ लिपा दशरथ रंगशालाय् धेंधें बल्लाः जुइत्यंगु खः ।
सन् २०१५य् विश्वकप ल्यज्याया झ्वलय् नेपाल व भारत दथुइ धेंधें बल्लाः जूबलय् कासा गोल मजूगु ज्वलिंज्वलय् क्वचाःगु खः । नेपाल व भारत निगुलिं टोली साफ च्याम्पियनसिपया तयारीया झ्वलय् दु । मैत्रीपूर्ण कासा धुंकाः नेपाली टोली लिपांगु तयारीया लागिं कतार वनेगु तयारीइ दु ।
असोज १५ गतेनिसें साफ च्याम्पियनसिप माल्दिभ्सय् न्ह्याइ । अन भारतं नं कासा म्हिती । नेपालं माल्दिभ्सलिासे म्हिताः साफ च्याम्पियनसिपया सुरुवात याइ ।
थ्व हे दथुइ, नेपाल व भारत दथुइया निगुलिं कासा सनिलया ५ताःत्या इलय् जुइगु अखिल नेपाल फुटबल संघ (एन्फां) जानकारी ब्यूगु दु । मैत्रीपूर्ण कासाय् दर्शक दुकायेगु बारे धाःसा आःतक्क निर्णय मजूनि ।
Categorized in कासा