जापान सरकारया अनुदानं उपलब्ध यागु एस्ट्राजेनिका खोप नेपाल थ्यंगु दु।

जापान सरकारं कोभ्याक्स सुविधापाखे अनुदान उपलब्ध यागु ५ लाख ५९ हजार डोज खोप थौं सोमबाः येँ थ्यंगु दु। स्वास्थ्य तथा जनसंख्या मन्त्रालयया प्रवक्ता डा. कृष्णप्रसाद पौडेलया कथं सोमबाः वयेवं जापानपाखे अनुदानय् उपलब्ध यायेवं १६ लाख १४ हजार ७४० मात्रा खोप थ्यंगु दु।

थ्व स्वया न्ह्यः साउन २३ व २४ गते ९ लाख मात्रा व थ्व हे भदौ ५ गते २ लाख ८ हजार ७ सय मात्रा खोप नेपाल वये धुकुगु दु। जापानपाखे उपलब्ध यागु खोप प्रदेश १ व २ या ज्येष्ठ नागरिकपिन्त बिइगु धका जानकारी बिगु खः।

वंगु फागुनय् कोभिशिल्ड काये धुकुपि ६५ दँया च्वय् दुपि ज्येष्ठ नागरिकपिन्त मन्त्रालयं एस्ट्राजेनिका खोप बिइत्यंगु खः। भारतपाखे खरिद याना कोभिशिल्ड खोप मवयेवं सरकारं जापानपाखे अनुदान कया एस्ट्राजेनिका खोप हःगु खः।

Categorized in राष्ट्रिय