येँया बुद्धनगरय् बौद्ध भावना केन्द्रय् प्रतिस्थापित बुद्ध मूर्तिया थौं छगु ज्याझ्वः दथुइ येँ महानगरया मेयर विद्यासुन्दर शाक्यं अनावरण यानादीगु दु। केन्द्रया न्हुगु भवन धम्महलय् ध्यान मुद्राय् च्वना बिज्याम्ह वुद्धया प्रतिमा अनावरण यानादीगु खः।

मूर्ति अनावरणलिपा मेयर शाक्यं, बुद्धया आदर्श व लुम्बिनीया पहिचानया निति राज्यया पाखे लगानी अप्वोकागु दु धका धयादीगु दु। ‘बुद्ध नेपालय् जन्मे जुगु तर बिहार धाःसा मेमेपिनिगु देशया ग्वाहालि निर्माण जुगु दु। बिहार सू ना दयकल धासा गुलिं  श्रीलङका, थाइल्याण्ड, जापानं दयकल धका लिसः वइ।

तर नेपाःया नां कम जक वइ। उकिइ जिगु नेतृत्वय् येँपाखे निर्वाचित जनप्रतिनिधिपिनिगु सामुहिक निर्णय याना नेपाली बज्रयान परम्पराया विहार निर्माण यायेत ग्वाहालि यायेत न्ह्याकूगु खः। थ्व स्वया न्ह्यः दातापिनिगु ग्वाहालि जक विहार निर्माण जुयाच्वंगु खः। जिपि वये धुका राज्ययागु न उपस्थिति खनेदुगु खः।’ महानगरं लुम्बिनीइ नेपाली शैलीया विहार दयकेत ग्वाहालि यनागु दु। येँ वडा २८ य् वुद्ध विहार, वडा ५ य् नर विहार लगायत मेमेगु ग्वाहालि याना विहार दयकेगुलि ग्वाहालि यानागु दु। मेयर शाक्यं धयादीगु खः।

उगु प्रतिस्थापित प्रतिमा बाबुकाजी शाक्यया परिवारं थः मदुपि मा अबु, जहान व काय् या नामय् दान यानादीगु खः। प्रतिमाय् प्रतिस्थापनया यायेत भिक्षु इन्दक स्थविरं शील प्रदान यानादीगु खःसा भिक्षु संघपाखे वुद्धाभिषेक (मंगल पाठ) व बुद्ध पूजा यानादीगु खः। भिक्षु ञाणाबुध स्थविरं उपदेश बियादीगु खः।

ज्याझ्वः लिपा मेयर शाक्यं धम्महल भवनया अवलोकन यानादीगु खः। भवन दयकेत महानगरं करीव ४ करोड रुपैयाँ आर्थिक सहयोग उपलब्ध यागु खः।

Categorized in राष्ट्रिय