बागमती प्रदेशया मुख्यमन्त्री अष्टलक्ष्मी शाक्य नियुक्त जुगु दु। वयकलं थौं बुधबाः हे पद व गोपनीयताया शपथ कागु दु।

एमाले दुने माधवकुमार नेपाल समूहय् दुम्ह नेता नेपालं न्हुगु पार्टी दर्ता यायेवं हे मुख्यमन्त्री नियुक्त यागु खः। न्हुगु पार्टी गठनय् नेता नेपालयात साथ मबिउम्ह शाक्ययात एमालेें वाग्मती प्रदेश संसदीय दलं बुधबाः हे दलया नेता ल्यंगु खः।

वयकःयात संसदीय दलया नेताय् निवर्तमान मुख्यमन्त्री डोरमणि पौडेलं हे प्रस्ताव यागु खः। एमालेपाखे बागमती प्रदेश सभाय्् ५६ म्ह सांसद दु।

कुल ११० सांसद दुगु बागमतीइ बहुमतया लागि ५६ सांसद आवश्यक दु। एमालेया सांसदया हे बलं पौडेलयाके बहुमत दु। बागमतीइ ओलीपक्षया ३५ व माधवपक्षया २१ म्ह सांसद दु।

प्रदेशय् प्रमुख प्रतिपक्ष नेकपा माओवादी केन्द्र २३, नेपाली कांग्रेस २२, विवेकशील साझा ३, नेपाल मजदुर किसान पार्टी २, राप्रपा २ व छम्ह स्वतन्त्र सांसद दु।

Categorized in राष्ट्रिय