नेपाली कांग्रेसया केन्द्रीय सदस्य डा. शेखर कोइरालां केन्द्रीय समिति बैठक पार्टी कार्यालय हे तयेगु निति ध्यानाकर्षण यागु दु।

पार्टी कार्यालय धर्ना जुगु धासे बैठक सभापति देउवाया निजी निवास बुढानिलकण्ठय् च्वंगुलि केन्द्रीय सदस्य कोइरालां नेतृत्वया ध्यानाकर्षण यागु खः। वयकलं धर्नाय् च्वपि थःपिनिगु हे पार्टी नेता कार्यकर्ता जुगु उल्लेख यासे धर्नायात क्यना बैठक पिने तयेगु उचित जुए मखु धका धागु दु। ‘थौं दुःख लगे जुगु दु।

सानेपायजा कार्यालय त्वःता केन्द्रीय समिति बैठक थन च्वना च्वंगु दु। पार्टी कार्यालय धर्ना च्वना च्वपि झी हे पासापि खः। उमिगु माग झीसं न्यनेहेमाः,’ केन्द्रीय समिति बैठकय् नेता कोइरालां धागु दु, ‘१३ क्वःगु महाधिवेशनय् न केन्द्रीय सदस्य पासापि पार्टी कार्यलयय् धर्ना च्वना च्वंगु दु तर पार्टी अफिसय् हे च्वन व पासापिनिगु माग सुनुवाइ जुल। जिगु इनाप दु हरेक केन्द्रीय समिति बैठक पार्टी अफिसय् तयेनु।’

वयकलं धयादीगु दु क्रियाशील सदस्यताय् खनेदुगु विवाद याकन हे टुंग्ये यायेमाः। विषेश महाधिवेशन व म्याद थपे यायेगु स्वीकार्य जुइ मखु धका धयादीसे वयकल क्रियाशील सदस्यताया समस्या समाधान मजूसे महाधिवेशन जुइ मखु धका अडान तःगु दु।

Categorized in राष्ट्रिय