लुम्बिनी प्रदेशया मुख्यमन्त्री कुलप्रसाद केसी व मन्त्रीपिन्स शपथ कागु दु। बिहीबाः प्रदेश प्रमुखया कार्यालयय् प्रदेश प्रमुख अमिक शेरचनं मुख्यमन्त्री व मन्त्रीपिन्स शपथ कागु खः।

बुधबाः मुख्यमन्त्री शंकर पोखरेलं राजीनामा बिइवं प्रदेश प्रमुखं न्हुम्ह मुख्यमन्त्री ल्ययेगु प्रक्रिया न्ह्याकूगु खः। नेपाली कांग्रेस, नेकपा माओवादी केन्द्र, जनता समाजवादी पार्टी व राष्ट्रिय जनमोचाया ४१ म्ह सांसदपिनिगु समर्थनं नेकपा माओवादी केन्द्रया संसदीय दलया नेता केसी मुख्यमन्त्री नियुक्त यागु खः। वयकलं बिहीबाः हे न्ह्यम्ह सदस्यीय मन्त्रिपरिषद विस्तार यागु खः।

उकिइ कांग्रेसपाखे डिल्लीबहादुर चौधरी, नेकपा माओवादी केन्द्रपाखे कृष्णध्वज खड्का, जनता समाजवादी पार्टीपाखे सहसराम यादव, पुरमती ढेंगा व सुमन शर्मा रायमाझी व अजय शाही मन्त्री जुगु दु। चौधरी शहरी तथा ग्रामीण विकास, कृष्णध्वज खड्का आर्थिक मामिला तथा योजना व सहसराम यादव भौतिक पूर्वाधार मन्त्री जुगु खः।

मेगु मन्त्रीपिन्त मन्त्रालय तोके यागु मदुनि।

Categorized in राष्ट्रिय