नेपाल विद्युत प्राधिकरणया प्रमुख कार्यकारी निर्देशक हितेन्द्रदेव शाक्यं सरकार थःगु राजीनामा माग यागु मखुसे वैकल्पिक व्यवस्थाबारे न्यंगु खः धका स्पष्ट यागु दु।

मंगलबाः प्रधानमन्त्री शेरबहादुर देउवां प्राधिकरणया कार्यकारी निर्देशक शाक्यया थासय् कुलमान घिसिङयात नियुक्त यायेत निर्देशन बिगु खबर प्रधानमन्त्रीया सचिवालयपाखे सार्वजनिक जुगु खः। उकिया कन्ह्य कुन्हु हे पत्रकारपि नाप खँल्हानादीसे शाक्यं सरकारं थःगु राजीनामा फ्वंगु मखु बरु वैकल्पिक छु जिम्मेवारी बिइ फइ धइगु बारे खँ जुगु धका धागु दु।

‘जिगु  क्षमता, कथं व आःतकया दक्षता कथं न्ह्या थाय् जूसा जिम्मेवार बिउसा सरकारं खटे यागु थाय् वनेत थाकु मजू’ शाक्य धागु दु थःत अपमानजनक तरिकापाखे मखु सम्मानजनक रुपं आःयागु पदपाखे पिहावनेत तयार दु धइगु संकेत तक बिगु दु। सरकारं न्ह्यागु थासय् खटे यास थः ज्या यायेत तयार दु धासो थःम्हेसिया महामारीया दथुइ प्राधिकरणय् च्वना यक्को ज्यायानागु धका धागु दु।

Categorized in राष्ट्रिय