बहुदलीय व्यवस्थाय् निर्दलीय प्रधानमन्त्री गथे ?
नृपेन्द्रलाल श्रेष्ठ | दिल्लागा षष्ठी ११४१,साउन १४ बिहीवाः
![](https://www.lahananews.com/sites/default/files/mayor_1%20%281%29_2.jpg)
वर्तमान सरकार छु दलयागु खः ? प्रधानमन्त्री शेरबहादुर देउवा कांग्रेसया प्रधानमन्त्री खः कि निर्दलीय प्रधानमन्त्री खः ?
स्वनिगःया राजनीतिक चाकलय् नं थौंकन्हय् थ्व न्ह्यसः पिहां वःगु दु।येँ महानगरपालिकाया प्रमुख लिसें नेकपा (एमाले) या नेता विद्यासुन्दर शाक्यं थ्व न्ह्यसः तयादीवं स्वनिगःया राजनीतिइ नं थ्व विषय चर्चाय् वःगु खः ।
वंगु आइतवाः जूगु छगू सार्वजनिक ज्याझ्वलय् वय्कलं न्हापांखुसी थ्व बिचाः तयादीगु खः । वयां लिपा येँया थीथी दल आवद्ध स्थानीय नेतातय् दथुइ नं थुकियात कयाः चर्चा शुरु जूगु दु। वय्कलं धयादिल, ‘जिं थथे धयाबलय् प्रधानमन्त्री देउवाया विरोध यात धकाः नं मनूतय्सं धया हल ।
तर जिं प्रधानमन्त्रीया विरोध यानागु मखु । संविधानय् गनं नं निर्दलीय प्रधानमन्त्री दइ धकाः कल्पना तकं याना तःगु मदु । तर देउवायात न्ह्यागु पार्टीया सांसदं भोट बिउसां जिउ धाल, ह्वीप लगे जुइ मखु हं, धायेबलय् वय्कः गय् जुयाः बहुदलीय प्रधानमन्त्री जुल ?’ नेपाःया वर्तमान राज्य व्यवस्थाय् निर्दलीय प्रधानमन्त्री नं जुइ धकाः संविधानय् गनं नं च्वया मतःगु दावी वय्कलं यानादिल।
अबलय् संविधान च्वःपिं नेपाली कांग्रेसया सांसदपिं ध्यानगोविन्द रंजित, गगन थापा थेंज्याःपिंके थ्व न्ह्यसः न्यनेमाःगु बिचाः वय्कलं तयादिल । प्रधानमन्त्री केपी शर्मा ओलीयात क्वःथलाः प्रधानमन्त्री जूवःम्ह भाजु शेरबहादुर देउवाया नियुक्ति निर्दलीय खः लाकि बहुदलीय खः धइगु थ्व राजनीतिक विवाद केन्द्रीयस्तरय् जक कायम जुयाच्वंगु खःसा मेयर शाक्यया थ्व धापू लिपा थुकियात कयाः नगरस्तरय् नं चर्चा शुरु जूगु दु।
Categorized in राष्ट्रिय