यलय् उपाकलं सायाः झःझः धाल
लहनान्यूज | गुंलागा पंचमि ११३७ (अगष्ट १२ २०१७)
तसकं हे वा वःसां नं वाया हे दथुइ यलय् नरसिंह जात्रा उपाकलं सायाः झःझः धायेक न्यायेकूगु दु ।
यलया द्यःब्रम्हू अर्थात राजोपाध्यायपिनिगु उपाकर्म गुथि अन्तर्गत दँय्दसं भाद्र कृष्ण पंचमिया दिनय् न्यायेका वयाच्वंगु नरसिंह जात्राय् थुगुसी तसकं वःगु वाया दथुइ नं त्वाःत्वाःपतिं द्यः दर्शन यायेगु लिसें पुज्यायेत त्वाःत्वाःपतिं सर्वसाधारणत म्वःम्वः हे मुंगु खः । लिसें वां दायक हे भक्तजनपिन्सं नरसिंहलिसें यल देय् नं चाःहूगु खः ।
यल उपाकर्म गुथि अन्तर्गत षटकुलया राजोपाध्यायपिनि दथुइ ज्येष्ठताया लिधंसाय् पाः न्ह्याकीगु थुगु जात्रायात थुगुसी तुइलाक्व मंगःया घनश्याम शर्मा राजोपाध्यायया छेँय् नं न्ह्याकूगु खः । जात्राया पाः लाःम्हेसिया जिलाजं अथवा भिनामचा अथवा पुरोहितयात नरसिंह दयेकेगु परम्परा कथं थुगुसी पाःलाःम्ह शर्माया जिलाजं अन्जन राज राजोपाध्याययात नरसिंह दयेकाः यल देय् चाःहुइकूगु खः ।
नरसिंहलिसें लक्ष्मी, सरस्वती व प्रल्हादयात यलया सायाः रुटय् चाःहुकूगु खः । पाः लाःम्हेसिया छेँय् नं हे जात्रा पिकायेगु व क्वचायेकेगु परम्परा कथं पाः लाःम्ह शर्माया छेँ तुइलाक्वं जात्रा न्ह्याःगु खःसा तुइलाक्वं सौगः, नुगः ओकुबहाल, थाइना, चक्रबही, हौगः, तिच्छुँगल्ली, वला, पुन्चली, गाःबहाः, पिम्बहाः, बालिफः, क्वालखु जुयाः मंगलं तुइलाक्वय् हे थ्यंकाः जात्रा क्वचाःगु खः ।
द्यःगणपिं लिसें खुज्वः अप्सरापिं, भजन पुचःत, धिमेय् पुचःत व थीथी झाँकिलिसें पिकाःगु जात्रा तसकं झःझः धाःगु खः ।
थुगु जात्रा सुथां लाःसा दैवीप्रकोप, ल्वय् आदिं मुक्ति चूलाइगु, जात्राया झ्वलय् नरसिंहया ल्यूने घानातइपिं कापःया कतांमरि भागियाकूसा मस्तय् अरिं मचाइगु जनविश्वास दया वयाच्वंगु दु ।
यलय् कात्ति प्याखनय् किपाइम्ह नरसिंहयात उग्र रुपया नरसिंह कथं काइसा उपाकलं सायाःया नरसिंहयात शान्त रुप कथं काइ ।
आःतक्क ने.सं ८६९ निसेंया प्रमाण लुइधुंकूगु दुसां थुगु जात्राया इतिहास धाःसा यच्चुक सीदये फुगु मदुनि । जात्रालिसे सम्बन्धित उपाकर्म गुथियाके ने.सं. ८६९ निसेंया जात्राया पाः काःपिनिगु धलः दुसां वयां न्ह्यःया प्रमाणत ईया गुगुं कालखण्डय् थीथी घटनाक्रमय् न्हनावंगु वा न्हंकाछ्वःगु जुइफुगु विज्ञतयगु धापू दु ।
Categorized in राष्ट्रिय
