भाषासेवी समाजसेवी चक्रमान डंगोल मदुगु खुदँ दूगुया वार्षिक तिथी लाका वयकःयात लुमंकेगु ज्या जूगु दु।

वयकः रेडियो उपत्यका एफ एमया संंस्थापक अध्यक्ष खःसा वन्दे नारायण परिवार क्लबया नं छम्ह संस्थापक खः। उगु ज्याझ्वलय् समाजसेवाः व भाषासेवाय् थःगु जीवन पानादीम्ह चक्रमान डंगोलयात लुमन्ती युगवाणी नेटवर्कया कजि पुपराज पराजुलीया सभाध्यक्षताय् जूगु खः।

ज्याझ्वलय् सन्तकुमार महर्जनं लसकुस न्वचु तयेगु झ्वलय् मदुम्ह डंगोलया गुण लुमंकूसे मदुम्ह डंगोलया किपाय् पाहाँपिन्सं श्रदान्जली कथं स्वाँमा व खादागा देछागु खः। मदुम्ह चक्रमान डंगोलयात लुमंकेगु झ्वलय् नेपाल पत्रकार संघया नायः विपुल पोखरेल,युगवाणी नेटवर्कया कार्यकारी सल्लाहकार कृष्ण केसि व कार्यकारी निर्देशक सुरेश आचार्यया नापनापं मदुम्ह डंगोल जहान मयजु लक्ष्मी डंगोल पिन्सं नं चक्रमान डंगोलयात लुमंकुसे श्रद्धान्जली देछानादीगु खःसा लुमन्ति ज्याझ्वः सन्चारकःमि प्रज्वल शाक्यं न्ह्याकादीगु खः।

Categorized in राष्ट्रिय