युरोकप : क्वाटरफाइनलया कासा धलः पूवन
बछलागा षष्ठी ११४१, असार १६ बुधबाः
![](https://www.lahananews.com/sites/default/files/en_1.jpg)
जर्मनीया बुकाः इंग्ल्याण्ड युरोकप फुटबलया क्वाटरफाइनलय् दुहाँवंगु दु ।
आयरल्याण्डया डब्लीनय् वंगु चान्हय् जूगु राउण्ड अफ सिक्सटीनया कासाय् इंग्ल्ल्याण्ड २–० गोल अन्तरं त्याःगु दु । जर्मनीविरुद्ध इंग्ल्याण्डयात त्याकेबीत राहिम स्टर्लिङ व ह्यारी केनं छगोल–छगोल याःगु दु ।
कासा बूगुलिसे जर्मनीया युरोकपया यात्रा प्रि क्वाटरफाइनलय् लिकुंगु दु । इंग्ल्याण्डं आः क्वाटरफाइनलय् युक्रेनलिसे धेंधेंबल्ला याइ । अथेहे वंगु चान्हय् हे जूगु मेगु कासाय् स्वीडेनयात थप याःगु ईलय् २–१ गोल अन्तरं बुकाः युक्रेन क्वाटरफाइनलय् थ्यंगु दु ।
कासाय् क्वःछिनातःगु ईलय् युक्रेनया जिन्चेकों न्हापांगु गोल याःसां स्वीडेनया एमिल फोर्सवर्गं ज्वलिंज्वः गोल याःगु दु । ई थप यायेधुंकाः, लिपांगु मिनेट जक ल्यंदुगु ईलय् युक्रेनया आर्तेम डोबिकं छगोल यानाः पुचःयात क्वाटरफाइनलय् थ्यंकूगु खः ।
![](https://www.lahananews.com/sites/default/files/pictures/Eurocup-8.jpg)
वंगु चान्हय्या कासालिपा युरोकप फुटबलया क्वाटरफाइनलया कासा धलः क्वःज्यूगु दु । शुक्रवाः जुइगु क्वाटरफाइनलया न्हापांगु कासाय् स्वीट्जरल्याण्ड व स्पेनदथुइ धेंधेंबल्ला जुइबलय् उकुन्हु हे इटालीं बेल्जीयमलिसे म्हिती ।
शनिवाः चेक रिपब्लीक व डेनमार्क अले इंग्ल्याण्ड व युक्रेनदथुइया कासा जुइ ।
Categorized in कासा