उत्तर कोरियाय् नसाज्वलंया चरम संकट
बछलाथ्व अष्टमी ११४१,असार ४ शुक्रवाः
![](https://www.lahananews.com/sites/default/files/korea_0.jpg)
उत्तर कोरियाय् नसा ज्वलंया तच्वकं अभाव जूगु दु ।
उत्तर कोरियाया नेता किम जोङ उनं थगुने धाकु फय् व खुसिबा चलःया हुनिं थःगु देशय् नसा ज्वलंया तच्वकं अभाव जूगु नालादीगु दु ।
कोरियाली वकर्स पार्टीया मुँज्याय् नेता किमं नसा ज्वलंया चरम अभाव जूगु धाःगु कोरियाली समाचार एजेन्सी केसीएनएं न्ह्यथंगु दु । उगु मुँज्याय् नेता उनं नसा ज्वलंया संकट थुगुसिइ झं तच्वइगु धका चिउता प्वंकादीगु दु ।
वयेकलं नसा ज्वलंया संकट जूसा नं देय्या मुक्कं अर्थतन्त्रय् धाःसा सुधार जूगु दावी यानादीगु दु ।
कोरोनाया महामारी न्ह्यागु नापं अमेरिका लिसेेंया दे्शं उत्तर कोरियाय् प्रतिबन्ध तःगु लिसे नसाज्वलंया चरम अभाव जूगु धाःगु दु ।
वंगु अप्रिलय् वकर्स पार्टीया पूर्ण मुँज्याय् नेता किमं देय्यात तनावपूर्ण नसाज्वलंया अभावया अवस्थां ल्यंकेमाःगु धयादीगु खः । सन् १९९० या सुरुवातय् नं उत्तर कोरियां नसा ज्वलंया चरम अभाव फय्माःगु खः ।