नेपाःया इतिहासय् फेसबुक व ट्वीटरय् आन्दोलन
नृपेन्द्रलाल श्रेष्ठ | गुंलाथ्व नवमी ११३७ (जुलाई १ २०१७)
नेपाःया इतिहासय् हे न्हापांखुसि थौं सुथंनिसें स्वनिगःया आदिवासी नेवाःतय्सं इन्टरनेट हडताल याःगु दु ।
थौं थःथःगु सामाजिक संजाल फेसबुक व ट्वीटरय् हाकूगु भूमि दुगु खबरदार धकाः रंजना लिपिं नापं देवनागरिक लिपि व रोमन लिपिं च्वयातःगु ल्हाः म्हूछ्याना पतिंचा धंकाःतःगु किपाः तया थःथःगु बिचाः तकं तयेगु यागु दु । अथे हे सेभ नेपाः भ्याली धकाः तकं च्वया तयेगु याःगु खः ।
स्वनिगलय् सतक विस्तारया नामय् नेवाःत नापं स्वनिगः वासी तय्त विस्थापित यायेत्यंगु, सतकय् धूया धू जूगु, बाहिरी चक्रपथ निर्माण यायेगु धकाः हःगु योजना नापं स्वनिगःया थःगु अस्तित्व समाप्त त्यंगु धकाः राज्ययात दबाव बिइगु कथं थः थे इन्टरनेट हडताल याःगु खः ।
नेपाः स्वनिगःयात ल्यंकेनु धइगु नारा बिया अथे हडताल याःगु खः । नेवाः मुद्दा ज्वनाच्वंपिं नापं राजनीतिक रुपं सचेतपिं अले भाषिक कार्यकर्तातय्सं अप्वःसिनं थःथःगु फेसबुक व ट्वीटरय् खबरदार धकाः च्वयातःगु किपाः तया इन्टरनेट हड्ताल याःगु खः ।
कयौं मनूतय्सं ला थःथःगु प्रोफाइ किपाः हे खबरदार धकाः च्वातःगु तकं तःगु खनेदत । स्वनिगः नेपाःया मानव सभ्याताया उदगम स्थल जूगुलिं थनया मानव वस्तीयात विस्थपित याये दइमखु धकाः खबरदारी कथं अज्वःगु हड्ताल याःगु खः ।
स्वनिगःवासीया मागयात सम्वोधन यायेमाःगु माग याना न्हापांखुसि अथे इन्टरनेट हड्ताल याःगु खः । थुगु कथंया हड्ताल कन्ह्यः सुथय् तक जुइ ।
Categorized in राष्ट्रिय
