निदँ दुने सच्छिगु देय्तय्त ५० क्वःति डोज खोप बीगु राष्ट्रपति बाइडेनया घोषणा
कछलागा औंसी ११४१,जेष्ठ २७ बिहीवाः
![](https://www.lahananews.com/sites/default/files/biden_4.jpg)
अमेरिकी राष्ट्रपति जो बाइडेनं वइगु निदँ दुने सच्छिगु देय्तय्त ५० क्वःति डोज कोरानाविरुद्धया फाइजर खोप उपलब्ध याकेगु धयादीगु दु ।
वय्कलं थुगुसी करिब २ क्वःति डोज खोप उपलब्ध याकेगु योजना दुगु धयादिल । सन् २०२२ या न्हापांगु खुलाय् ३० क्वःति डोज खोप वितरण यायेगु योजना दुगु राष्ट्रपति बाइडेनया धापू दु ।
खोप चूलाकीगु देय्तमध्ये ९२ निम्न आय दुगु व ८ अफ्रिकन युनियनया दुुजः दुगु धाःगु दु । गरिब राष्ट्रतय्त खोप उपलब्ध याकेत अमेरिकायात दवाव वःगुलिसें बेलायत भ्रमणय् दीम्ह राष्ट्रपति बाइडेनं वइगु निदँ दुने उगु खोप उपलब्ध याकेगु प्रतिवद्धता प्वंकादीगु बीबीसीं न्ह्यथंगु दु ।
वय्कलं हलिमय् कोरानाविरुद्धया खोप उपलब्ध याकेत थःगु विशेष रणनीति दुगु नं धयादिल । थ्व हे वाःया सुरुइ जी सेभेन पुचःया राष्ट्रतय्सं नं गरिब देय्या लागिं खोप उपलब्ध याकेगु प्रतिवद्धता प्वंकूगु खः । राष्ट्रपति निर्वाचित जुइधुंकाः न्हापांगु खुसी छवाःया भ्रमणय् बेलायत थ्यंकादीम्ह बाइडेनं नाटो शिखर सम्मेलनय् नं ब्वति कयादीगु धाःगु दु । अथे हे, वय्कलं बेलायतया राजपरिवारया दुजःतलिसे नं औपचारिक भेटवार्ता यानादीगु बुखँय् धयातःगु दु ।
अथेहे, बाइडेनं युरोप यात्राया अन्त्यय् रुसी राष्ट्रपति भ्लादिमी पुटिनयात नं नापलानादीगु धाःगु दु ।
Categorized in अन्तर्राष्ट्रिय