येँ महानगर प्रमुख विद्यासुन्दर शाक्यया रोहवरय् येँ महानगरपालिका व फ्रान्सया मेड्सा डु मोन्ड दथुइ थुगु सम्झौता जूगु खः ।

सम्झौताय् महानगरपाखें वडा १९ या वडाध्यक्ष शशीलाल श्रेष्ठ व मेड्सापाखें नेपाल प्रतिनिधि डा. गियोम फेबोलं ल्हाःचिं तयादिल । येँया अनौपचारिक सफाईकःमि व सहरी समुदायया स्वास्थ्यय् पहुँच थकायेत वडा १९ या सहरी स्वास्थ्य केन्द्रयात सहरी स्वास्थ्य प्रवर्ध्दन केन्द्रया रुपं स्तरोन्नति यायेत सम्झौता जूगु दु।

सम्झौता धुंकाः महानगर प्रमुख शाक्यं  परियोजनां लक्षित पुचलय् ज्याझ्वः थ्यंकेत अःपुइगु प्रतिक्रिया बियादिगु खः ।‘स्वास्थ्य सेवाय् सकसिगु समान पहुँच विस्तार यायेत जिमिसं लगानी थकयागु दु । पूर्वाधार सुधार, उपकरण खरिद व जनशक्तिया समुचित परिचालनं जिमिसं आज्जुइ थ्यंके’ मेयर शाक्यं धयादिल ।

मेयर शाक्यं आः कोभिड महामारी व्यवस्थापनय् महानगरं यानाच्वंगु ज्याया बारे चर्चा यासें सकसितं कोभिड विरुद्धया खोप बीत सरकारलिसे जानाः ज्या यानाच्वनागुलिं हथाय् मचायेत इनाप यानादिल । न्हापां खोपय् च्यूताः मतःगु व आः चाप अप्वःगु अनुभव न्यंकुसें वयकलं गलत सुचंया शिकार मजुइत इनाप यानादिल।

परियोजना शुरुवातया विषयस खँ ल्हासें डा. फेबोलं प्रयोगशाला स्थापना, जनशक्तिलिसें चिकित्सकीय सामग्री अले उपकरण तनेगु योजना न्यंकादिल । सम्झौता कथं येँ महानगरपालिकां १ करोड ५ लाख ४० हजार तका ब्यहोरे याइ ।

परियोजना न्ह्याकेत समन्वय समिति अले रणनीतिक व व्यवस्थापन समिति नीस्वनी । सम्झौता कथंया स्वास्थ्य प्रवर्ध्दन केन्द्र वडा १९ य् स्थापना जूसां मेगु वडा व नुवाकोटको ल्याण्डफिल साइट क्षेत्रय् दुगु स्वास्थ्य चौकीं तकं सेवा बीगु धाःगु दु।

Categorized in राष्ट्रिय