राष्ट्रिय जनगणना, २०७८ न्ह्याइगु
कलछलागाः चर्तुर्थी ११४१, जेठ २६ गते बुधबाः
कोरोना महामारीया हुनिं दिनाच्वंगु राष्ट्रिय जनगणना साउन लिपाः न्ह्याकिगु जूगु दु । राष्ट्रिय जनगणना सञ्चालक समितिं राष्ट्रिय जनगणना, २०७८ वइगु साउन १५ निसें असोज १५ गते तक्क यायेगु प्रस्ताव तयार याःगु खः ।
समितिया उगु प्रस्ताव मन्त्रिपरिषदं निर्णय यायेधुंका कार्यान्वयनय् हयेगु केन्द्रीय तथ्यांक विभागं न्ह्यथंगु दु । कोरोना संक्रमण दरय् म्हो जुयावगुलिं न्हूगु मिति क्वछिउगु विभागं न्ह्यथंगु दु ।
थ्वसिबें न्ह्यः जेठ २५ गतेनिसें असार ८ गतेतक्क देययंक छक्वलं राष्ट्रिय जनगणना यायेगु धलः सार्वजनिक याःगु खः । कोरोनाया संक्रमण अप्वयावसेंलि वंगु वैशाख २० गतेया मन्त्रीपरिषद मुँज्यां जनगणनाया दक्वः ज्या दिकेगु निर्णय याःगु खः ।
आः सम्भव दत्तले थ्वयांन्ह्यः जनगणनाया ज्याः गन दिकूगु खः वहे थासं ल्यंदनिगु ज्या न्ह्याकेगु विभाग धाःगु दु । विभागं ७७गू जिल्ला व न्हेगु हे प्रदेशय् ज्याकू निस्वंगु दु धाःसा जनगणनाया लागि च्याद्वः सुपरीवेक्षक व ३९द्वः गणक पिनिगु ल्यज्या यायेधुंकूगु दु । राष्ट्रय प्रशिक्षक, सहजकर्ता, प्रदेश लिसें जिल्ला जनगणना अधिकारी तालिम, प्रदेशस्तरीय मुख्य प्रशिक्षक, प्रशिक्षण, स्थानीय जनगणना अधिकारी तालिम क्वचायकेधुंकूगु दु ।
विभागं जिल्ला व स्थानीय तहस जुइगु तालिमया लागि तालिम केन्द्र व प्रशिक्षण ज्वलं तयार याना दक्वः तालिम केन्द्र व जिल्लाय् न्हापा हे थ्यंकेधुंकुगु दु । थुगुसी जुइगु जनगणनाया लागि सरकारं “मेरो गणना, मेरो सहभागिता” धैगु नारा तय याःगु दु ।
