यलः महानगरं कोरोनां मदुपिनिया छेँजपिन्त छगू लखः बिइगु
राम डंगोल | कछलागा नवमी ११४१, जेठ २१ शुक्रबाः
यलः महानगरपालिकां कोभिड १९ या संक्रमणं मदुपिंया परिवारयात छगू लखः ध्येबा ग्वहालि यायेगु निर्णय याःगु दु ।
शुक्रबाः कोभिड १९ विषयस् पत्रकार सम्मेलन याना यलः महानगरपालिकाया मेयर चिरीबाबु महर्जनं यलः महानगरपालिकाय स्थायी बसोबास यानाच्वंपि महानगरवासीपिं कोभिड १९ संक्रमित जुया वासः यायेगु झ्वलय् मन्त धाःसा मृतकया परिवारयात महानगरपालिकां प्रति परिवार छगू लखः ध्येबा बिइगु निर्णय याःगु खः ।
अथेहे आइसीयू व भेन्टिलेटरय वासः याना लँपिन्त म्होतिं ५०द्वः व अस्पताल भर्ना जुया कोभिडयात त्याकूपिन्त म्होतिं २५द्वः ध्येबा बिइगु जानकारी महानगरं बिल ।
महानगरपालिकापाखें ग्वहालि कायेत सिफारिस पौलिसं कागजपत्र माःगु नं धयादिल । महानगर दुनेया दक्व वडाय् पिसिआर व एन्टिजेन परीक्षणया व्यवस्था नं यानागु मेयर महर्जनं धयादिल ।
वय्कलं महानगरपालिकां अक्सिजनलिसें अत्याधुनिक आइसोलेसन सेन्टर न्ह्याकागु नं न्ह्यथनादिल । वडा नं. २६ सुनाकोथीया नेपाल युथ फाउण्डेसनया पोषण पुनस्र्थापना गृहलय् एचडीयूलिसें ५०गू शैयाया आइसोलेसन सेन्टर व वडा नं. ४ या बागडोलय् दूगु ज्यापू समाजया वृद्धाश्रम आनन्द निकेतन भवनय् १०गू शैयाया आइसोलेसन सेन्टरय् मनोसामाजिक परामर्श, पौष्टिक व सन्तुलित नसाः निःशुल्क कथं बिइगु ज्या नं न्ह्याकाच्वनागु जानकारी बियादिल ।
