ब्ल्याक फङ्गसया उपचार यायेत माःगु वासः बंगलादेशपाखे वइगु
राम डंगोल | कछलागा नवमी ११४१, जेठ २१ शुक्रबाः
बंगलादेशपाखें थ्यंमथ्य च्याद्वः मात्रा हाकूगु ढुसी अर्थात् ब्ल्याक फङ्गसया वासः शनिबाः नेपालय् वइगु जूगु दु ।
बंगलादेशया बिकन फार्मास्यूटिकल्स लिमिटेडं ब्ल्याक फङ्गसया वासःया नितिं दयेकूगु वासः एम्फोटेरिसिन ‘बी’या न्हापांगु लट शनिबाः हयेत्यंगु खः ।
औषधि व्यवस्था विभागया सूचना अधिकारी सन्तोष केसीया कथं भारतं नेपाःयात बिइगु वासः एम्फोटेरिसिन ‘बी’ मौज्दात कथं तयेगु जूसां लिपांगु इलय् भारतय् अप्वःयाच्वंगु रोगया हुनिं निर्यातय् प्रतिबन्ध तसेंलि वासःया मगामचाः जूगुलिं बंगलादेशं वासः हयेमाःगु धयादिल ।
नेपालय् आःतक १०म्हेसिके ब्ल्याक फङ्गसया ल्वचं कःगु पुष्टि स्वास्थ्य तथा जनसंख्या मन्त्रालयं याःगु दु । स्वासथ्य मन्त्रालया प्रवक्ता डा. कृष्णप्रसाद पौडेलया अनुसार ब्ल्याक फङ्गसया ल्वगि त येँ, नेपालगञ्ज व वीरगन्जय् लूगु खः ।
पौडेलया कथं कोरोना थें हे ल्वय् न्यनामवंसां ४५ निसें ६५दँया मधुमेह वा शरीरय् रोग प्रतिरोधात्मक क्षमता म्हो जूपिं व यक्वः प्रकारया एन्टिवायोटिक वा स्टेरोइड वासः नयाच्वपिंपिन्त ब्ल्याक फङ्गस जुइगु धयादिल ।
ब्ल्याक फङ्गस पाखें ल्यनेत सफा व गंगु मास्क छ्यलेगु, मास्क हियाः मपुनेगु, न्हियान्हिथं ल्हाःतुती सिलेगु, स्यानिटाइजरयो प्रयोग यायेगm, छेँ पिहाँवनेगु वा फोहरय् ज्या यायेमाल धाःसा डिस्पोजेवल पञ्जा न्ह्यायेगु, यक्वः धू दुथाय् मवनेगु व ओसिलो थासय् मवनेगु, चिलखः न्हाय् सफा यायेगु चिकित्सकपिन्सं धाःगु दु ।
