येँ महानगरपालिकाया प्रमुख विद्यासुन्दर शाक्यं होम आइसोलेसनय् च्वनेगु बाँलागु लकस मदुपिं व अक्सिजनलिसेंया आइसोलेसन मापिं कोभिड विरामीपिन्त येँ महागरपालिकां व्यवस्थापन यानातःगु आइसोलेसनय् च्वनेत इनाप यानादिल ।

कोभिड १९ रोकथाम व कजय् कायेगु क्षमता अप्वेकेत जनसरोकार ट्रष्ट (काठमाडौं मोडेल अस्पताल) व हेल्पिङ्ग ह्याण्ड अस्पतालयात थौं प्यंगु थान आइसीयु भेन्टिलेटर लःल्हाज्या ज्याझ्वलय् न्ववासें मेयर शाक्यं थुजागु इनाप यानादिगु खः । “कोभिड संक्रमण जुल धाःसा व छेँ च्वनेगु समस्या दु धाःसा, छिकपिं गनया वडावासी खः वहे वडाय् स्वापू तयादिसं” मेयर शाक्यं धयादिल, “निःशुल्क भोजन व अक्सिजनलिसेंया आइसोलेसन सेन्टरय् तयेगु व्यवस्था जिमिसं याये” ।

वय्कलं संक्रमण जुल धकाः हथा चायेगु व वासः यायेत ग्यात धाःसा उकिं मेमेगु झन्झट जुइफइगु न्ह्यथनादिल । वय्कलं थःयात संक्रमणया शंका जुल व छुं मछिनावल धाःसा थथें वासः यायेत नं इनाप यानादिल । झि दक्वः छप्पं जुया कोभिडविरुद्धया लडाईं त्याकेत नं इनाप यानादिल । येँ महानगरपालिकां कार्यपालिकाया मुँज्या च्वना कोभिड संक्रमण दरयात म्हो यायेगु व कोभिडया बारे ध्यान बियाच्वंच्वं हे संक्रमण जुल धाःसा वासः यायेत अस्पताल थ्यनेवं याउँक वासः यायेफयेमा धैगु मनतुंना सरकारी व सामुदायिक अस्पताललिसे सहकार्य जानागु लुमंकादिल ।

महानगरपालिकां चिकित्सा विज्ञान राष्ट्रि प्रतिष्ठान वीर अस्पतालयात १५, त्रिवि शिक्षण अस्पतालयात १०, शहिद गंगालाल राष्ट्रिय हृदय केन्द्रयात ४, छत्रपाटी निःशुलक चिकित्सालययात ४, नेपाल कोरिया मैत्री नगरपालिका अस्पतालयात ३, महेन्द्र नारायण निधि मेमोरियल अस्पतालयात २, हेल्पिङ्ग ह्याण्डस् सामुदायिक अस्पतालयात २, जनस्वास्थ्य सरोकार ट्रष्ट (काठमाडौं मोडल अस्पताल) यात २ व शुक्राराज ट्रपिकल तथा सरुवा रोग अस्पतालयात २ थान भेन्टिलेटर ग्वहालि याःगु दु ।

अथेहे कोभिडया ल्वगिपिनिगु दक्व खर्च महानगरं व्यहोरे यायेगु सर्तलिसें छत्रपाटी निःशुल्क चिकित्सालययात कोभिड अस्पतालया रुपय् रुपान्तरण याना सेवा बियाच्वंगु दु । अथेहे महानगरं सच्छि दँ सिबें अप्व पुलाँगु नरदेवी आयुर्वेदिक अस्पतालयात नं आइसोलेसन सेन्टरया कथं विकास याःगु दु । येँ महानगरपालिकाया उपप्रमुख हरिप्रभा खड्गी श्रेष्ठं न्हापांगु लहर सिबें नं निगूगु लहरया कोभिडं अप्वः संक्रमण याःगु धासें थथें महानगरपालिकां अस्पताल दयेके मपूmगुलिं सरकारी व सामुदायिक अस्पताललिसे सहकार्य याना न्ह्यानाच्वनागु धयादिल । “काभिड न्हंकाछ्वयेत दक्व अस्पतालय् अक्सिजन म्हो जुइके मबिइगु व छेँछेँ वना खोप बिइगु अभियान न्ह्याकेगु” वय्कलं धयादिल ।

हेल्पिङ्ग ह्याण्ड्सया कार्यकारी प्रमुख गुप्तबहादुर श्रेष्ठं ७७गू जिल्लाया हे ल्वःगितय्सं वासः यावइगु अस्पतालयात महानगरपालिकां याःगु ग्वहालि च्वछायेबःगु धयादिल । काठमाडौं मोडल अस्पतालया कार्यकारी निर्देशक डाक्टर राजेशध्वज जोशीं महानगरं याःगु ग्वहालियात छ्यलाबुलाय् हया यक्वः ल्वगिपिन्त सेवा बिइगु बचं बियादिल ।

Categorized in राष्ट्रिय