थौं नेपाःयात संघीय लोकतान्त्रिक गणतन्त्र नेपाल घोषणा याःगु १३दँ पूवंगु दु । गणतन्त्र दिवस स्वदेश लिसें विदेशय् दिइपिं नेपाःमिपिन्सं थीथी कथं हनाच्वंगु दु । २०६२÷६३ जनआन्दोलन धुंका जूगु निर्वाचनं निस्वंगु संविधानसभाया न्हापांगु मूँज्यां २०६५ जेठ १५ गते नेपाःयात संघीय लोकतान्त्रिक गणतन्त्र घोषणा याःगु खः ।

निसः व ३८दँ ताःहाकगु शाहवंश राजपरम्पराया अन्त्य जूगु उगु दिंयात दँयदसं गणतन्त्र दिवस कथं हनावयाच्वंगु दु । तर थुगुसी कोरोना भाइरस संक्रमणया जोखिमया हुनिं औपचारिक कथं समारोह ग्वसाग्वःगु मदु । सरकारं दीपावली याना दिवस हनेत आह्वान याःगु दु । गणतन्त्रयात जनता त्याःगु पर्वया कथं हनेत इनाप यासां कोरोना महामारीया हुनिं अक्सिजन तक्कं मदया ज्यान छ्वयामाःगु ईलय् जनता उत्साहित खने मदु ।

सत्ताया लुंछाचुडीइया कारणं गणतान्त्रिक व्यवस्था हे धरापय् लाइगु टिप्पणी जुयाच्वंगु दु । थ्वहे दथुई राष्ट्रपति विद्यादेवी भण्डारीं मन्त्रिपरिषदया सिफारिसय् गणतन्त्र दिवसया वलय् ४३०म्ह कैदी पिनिगु ल्यं दनिगु कैद मिनाहा याना त्वतेत उजं बिउगु दु ।

थ्वहे दथुई थुगुसी गणतन्त्र दिवस सैनिक मुख्यालय् ग्वसाग्वःगु दु । विगतय् तिन्ख्यलय् न्ह्यानाच्वंगु गणतन्त्र दिवसमूल समारोह थुगुसी सैनिक मुख्यालय् लिकुंगु खः ।

Categorized in राष्ट्रिय