किपूया मेयर रमेश महर्जनयात भिंतुना पौ लःल्हात
लहनान्यूज | गुंलाथ्व पारु ११३७ (जुलाई २४ २०१७)
![](https://www.lahananews.com/sites/default/files/21_2.jpg)
किपू नगरपालिकाया मेयर रमेश महर्जनयात नेवाः पत्रकारतपाखें भिंतुना पौ नापं ज्ञापन पौ लःल्हाःगु दु ।
देय्न्यंकंया नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया केन्द्रीय ज्यासना पुचःया ग्वसालय् न्हूम्ह मेयर महर्जनयात कार्यकाल सफलताया कामनायासें भिंतुना पौ नापं ज्ञापन पौ लःल्हायेगु ज्या पत्रकार दबूया केन्द्रीय नायः श्रीकृष्ण महर्जनं यानादीगु खः ।
मूछ्याञ्जे सुनिल महर्जनं ब्वना न्यंकादीगु भिंतुना पौ व ज्ञापन पौ लःल्हायेगु ज्या नाप नापं स्थानीय तह व स्थानीय पत्रकारतय्गु दथुइ स्वापूया बारे नं सहलह जूगु खः । उगु इलय् स्थानीय पत्रकारतय्त प्राथमिकता बिया ज्या याना वनेमाःगु बारे सहलह जूगु खः ।
मेयर रमेश महर्जनं स्थानीय नेवाः पत्रकारतलिसे जाना ज्या याना वनेगु बचं बियादीगु दु । नेवाः पत्रकारतपाखें भिंतुना पौ नापं थःगु ध्यानाकर्षण यायेगु कथं ज्ञापन पौ लःल्हाःगुलिं थःत तसकं लसता वल धयादीगु खः ।
![](http://www.lahananews.com/sites/default/files/pictures/medium_23_1.jpg)
ज्याझ्वलय् केन्द्रीय न्वकू नृपेन्द्रलाल श्रेष्ठ, केन्द्रीय दुजः रचना श्रेष्ठ, नविन जोशी, नजरराम महर्जन नापं येँ जिल्ला समितिया दुजःपिं व मेमेपिं पत्रकारत नं सहभागी दगु खः ।