यास ग्वःयफसं भारत आक्रान्त
कछलाथ्व पुन्ही ११४१,जेष्ठ १२ बुधवाः
कोरोना महामारीं आक्रान्त जुयाच्वंगु भारतय् हाकनं मेगु छगू विपत्ति दुहाँवःगु दु व खः यास ग्वःफय् ।
यास दुहांवःगुलिसें पश्चिम बंगालय् निम्ह सीगु दुसा ४०खा छेँय् क्षति जूगु दु । यास चक्रवात उडिसाया भद्रक जिल्लाया धामरा बन्दरगाह जुयाः पश्चिम बंगालपाखे न्ह्याःवंगु भारतीय अधिकारीतय्सं न्ह्यथंगु दु ।
उडिसा दुहांवनेगु झ्वलय् दुगु हे इलय् भारतया थीथी राज्यय् तसकं वा वयाच्वंगु दु । बंगालया खाडी व उडिसाय् तसकं वा वःगु हुनिं अनया जनजीवन प्रभावित जूगु दु ।
भारतया पश्चिम बंगाल, उडिसालिसें ८ राज्यय् दुहांवनीगु अनुमान यानातःगु यास ग्वःफय्यात ध्यानय् तयाः सम्भावित ८ राज्यया असुरक्षित १० लख जनतायात सुरक्षित थासय् ल्ह्यःगु दुसा अझं ७ लखयात ल्ह्ययेगु ज्या जुयाच्वंगुण् दु ।
प्रतिघण्टा सच्छि व ५५ निसें सच्छि व ६५ किलोमिटरया गतिं वइगु अनुमान यानातःगु ग्वःफय्या क्षति क्वपालेत कोलकता विमानस्थलं बीगु विमान सेवा थौं न्हिच्छिया नितिं बन्द याःगु दु ।
