युरोपियन युनियनं बेलारुसयात प्रतिबन्ध तल
कछलाथ्व चतुर्दशी ११४१,जेष्ठ ११ मंगलवाः
सञ्चारकःमियात गिरफ्तार याःगुलिसें युरोपियन युनियनं बेलारुसयात प्रतिबन्ध तइगु जूगु दु ।
थः विरोधी पत्रकारयात नियन्त्रणया लागिं छ्यःगु विमान व विमानस्थलय् युरोपियन युनियनय् आवद्ध २७ देशय् उडान प्रतिबन्ध तःगु अलजजिरां न्ह्यथंगु दु । ग्रीसं लिथुआनियापाखे यात्रा यानाच्वंगु ¥यानएयरया विमान आइतबाः कयौं घण्टा बेलारुसपाखे हीकूगु खः ।
विमानय् दुम्म्ह पत्रकारयात ज्वनेत विमान बेलारुसपाखे हीकाः विमानय् दुपिं थः नागरिकया जीवनलिसे म्हितेत स्वःगु धासें अमेरिका व युरोपियन युनियनं कडा विरोध प्वंकूगु खः । युनियनं विमान प्रकरणलिसें बेलारुसयात राज्य आतंकया द्वपं ब्यूगु दु ।
नेक्स्टा ग्रुपया पूर्वसम्पादक रोमन प्रोटासेभिचयात हिरासतय् कायेधुंकाः जक उगु विमानयात हाकनं ब्वयेगु अनुमति ब्यूगु खः । बेलारुसया सञ्चारमाध्यय् उगु विमानय् बम दुगु समाचार वनेवं लडाकू विमानतय्सं घेरा तयाः बेलारुसया राजधानी मिन्स्कय् आपतकालीन अवतरण याकूगु अन्तर्राष्ट्रिय समाचार संस्थातय्सं न्ह्यथंगु दु ।
Categorized in अन्तर्राष्ट्रिय
