न्हूगु सरकारया नितिं राष्ट्रपतियात विपक्षीपिनिगु आह्वान
लहानान्युज | चौलागा चतुर्दशी ११४१,बैसाख २७ मंगलवाः
प्रतिनिधि सभापाखें विश्वासया मत काये मफुसेंलि पदमुक्त जुयादिम्ह प्रधानमन्त्री केपी शर्मा ओलीया विकल्प कथं न्हूगु सरकार गठन यायेत लबिङ न्ह्याःगु दु ।
नेपाली कांग्रेसया सभापति शेरबहादुर देउवा, नेपाल कम्युनिष्ट पार्टी माओवादी केन्द्रया नायः पुष्पकमल दाहाल प्रचण्ड व जनता समाजवादी पार्टी नेपालया नायः उपेन्द्र यादवं संयुक्त विज्ञप्ति जारी याना राष्ट्रपति विद्यादेवी भण्डारीयात न्हूम्ह प्रधानमन्त्री नियुक्तिया प्रकृया न्ह्याकेत आह्वान यानादिगु दु ।
संसद मुँज्या क्वचायेवं स्वंगु दलया मुँज्यां थ्वः आह्वान यानागु प्रचण्ड धयादिल । संयुक्त विज्ञप्तिइ प्रधानमन्त्री ओलीं नेपालया संविधानया धारा १०० या उपधारा १ बमोजिम विश्वासया मतया लागि प्रतिनिधिसभाय् तयादिगु प्रस्ताव संविधानया धारा १०० या उपधारा ३ कथं प्रतिनिधि सभाय् थथें दूगु दक्वः दुजतय्गु ल्याखं बहुमतपाखें मुक्त जुइगु उल्लेख दु ।
विज्ञप्तिइ संविधानया धारा ७६ या उपधारा २ कथं प्रधानमन्त्री नियुक्त यायेगु प्रक्रिया न्ह्याकेत राष्ट्रपतियात आह्वान यायेगु धयातःगु दु ।
उगु धाराय् प्रतिनिधि सभाय् छुं नं दलया स्पष्ट बहुमत मदुगु अवस्थाय् प्रतिनिधि सभाय् प्रतिनिधित्व याइगु निगू वा निगूसिबें अप्वः दलतयेगु समर्थनय् बहुमत कायेपूmगु प्रतिनिधि सभाया दुजःयात राष्ट्रपतिं प्रधानमन्त्री नियुक्त यायेगु प्रावधान दु ।
