पोष्टर उपन्यासया पूर्व प्रकाशन सम्वाद
लहनान्यूज | दिल्लाथ्व अष्टमी ११३७ (जुलाइ १ २०१७)
![](https://www.lahananews.com/sites/default/files/malla.jpg)
नेवाः न्ह्यलुवा मल्ल के. सुन्दरया पिदनेत्यंगु उपन्यास ‘पोष्टर’ या पूर्व प्रकाशन सम्वाद येँय् जूगु दु ।
पिदनेगु तयारीइ दुगु उपन्यासयात कयाः संचारकःमिलिसें साहित्यकारपिन्सं समीक्षा यासें पूर्व प्रकाशन सम्वाद जूगु खः ।
सम्वाद ज्याझ्वलय् पत्रकार पुष्कर माथेमा, पत्रकार राजेन्द्र महर्जन, संचारकःमि लिसें साहित्यकार रजनी मिला व सुरेश किरण मानन्धरं पोष्टर उपन्यासया समीक्षा यानाद्यूगु खः ।
समीक्षाया झ्वलय् प्यम्ह समीक्षकपिन्सं उपन्यासया मू पात्र कथं प्यम्ह हे पात्रपिनिगु नां काःबलय् सम्वादया स्वकुमिपिनि दथुइ धाःसा तःधंगु उत्सकुता थनाब्यूगु खः ।
![](http://www.lahananews.com/sites/default/files/pictures/malla2.jpg)
उपन्यास च्वमि मल्ल के. सुन्दरं उपन्यासया प्यम्ह पात्रपिन्त हे थम्हं महत्व बियागु व मू पात्र ल्ययेगु ज्या पाठकयागु हे जुइगु धयादिल ।
लिसें सफू पिथने न्ह्यः समिक्षकपिनिगु दथुइ सहलह यायेगु पाश्चात्य तजिलजियात थम्हं नेपालभाषा साहित्यय् न्ह्याकेत स्वयागु नं भाजु मल्लं धयादिल । थुकथंया पूर्व प्रकाशन सम्वाद नेपालय् हे न्हापांगु खुसी जूगु वयकःया दावी खः ।
समीक्षकपिनिगुपाखें वःगु सल्लाह, सुझाव कथं उपन्यासय् ज्या यानाः याकनं हे बजारय् पितहयेगु उपन्यास च्वमि मल्लं धयादीगु दु ।
Categorized in मनोरन्जन