चेन्नई सुपर किङ्स आईपीएल लिगया शीर्ष थासय्
चौलागा तृतिया ११४१,बैसाख १६ बिहीवाः
चेन्नई सुपर किङ्स इन्डियन प्रिमियर लिग (आईपीएल) टी–ट्वान्टी क्रिकेटया शीर्ष थासय् थ्यंगु दु । वंगु चान्हय् जूगु कासाय् सनराइजर्स हैदरावादयात ७गू विकेटं बुका चेन्नई शीर्ष थासय् थ्यंगु खः ।
हैदरावादं बिउगु सच्छि व ७२गू रनया आज्जु चेन्नईं १८गू ओभर ३गः बलय् जक ३गू विकेट तंका पूवंकल । चेन्नई त्यागुलिइ रुतुराज गायकवाड व फाप डु प्लेसिसं अर्धशतकीय इनिङ्स म्हितुगु खः ।
गायकवाडं ७५गू रनया इनिङ्स म्हितुबलय् प्लेसिसं ५६गू रन दयेकल । मोइन अलि १५ गू रनय् आउट जुल । सुरेश रैना १७गू व रविन्द्र जडेजां अविजित ७ गू रन दयेकुगु खः । हैदरावादया राशिद खानं ३ गू विकेट काःगु खः ।
थ्वयान्ह्यः टस त्याका न्हापा ब्याटिङ याःगु हैदरावादं २०गू ओभरय् ३गू विकेट तंका सच्छि व ७१गू रन दयेकुगु खः । हैदरावादया नितिं मनिस पाण्डें ६१गू रनया अर्धशतकीय इनिङ्स म्हितल ।
अथेहे कप्तान डेभिड वार्नरं ५७ गू रनया इनिङ्स म्हितल । केन विलियम्स २६गू व केदार जादब १६गू रनय् अविजित जुल । चेन्नईया लुंगी एनजिडीं २गू लिसें साम कुरनं १गू विकेट काःगु खः ।
कासा त्यागु लिसें चेन्नईं ६गू कासाय् १०गू ल्याः मुंकुगु दु । चेन्नईया थ्व ५गूगु जित खः । हैदरावादया थ्व ५गूगु हार खः । लिउने दूगु हैदरावादं ६गू कासाय् २ गू ल्याः मुंकुगु दु ।