कोभिड १९ या न्युनीकरण, रोकथाम व नियन्त्रणया लागिं सहलह यायेत मंगलबाः च्वंगु विशेष कार्यपालिका बैठकं कोभिड १९ व मेपिं विरामीया लागिं बिस्कं बिस्कं एम्बुलेन्सया व्यवस्था यायेगु निर्णय याःगु खः ।

नेपाल एम्बुलेन्स सेवा १०२ लिसेया सहकार्यय् येँ महानगरपालिकां कोभिड पोजेटिभ व मेपिं विरामीतयत अस्पताल यंकेत महानगरया थीथी क्षेत्रय् आःयात झिगः निःशुल्क एम्बुलेन्सया व्यवस्था यानागु महानगर प्रमुख विद्यासुन्दर शाक्यं जानकारी बियादिल ।

‘एम्बुलेन्स सेवा कायेत महानगरया हटलाइन व तप्यंक चालकयात स्वापू तयेगु व्यवस्था जुइ, डाइलोसिस लिसें दीर्घ ल्वय् व आकस्मिक सेवा कायेत अस्पताल यंकेमाःम्ह मनूया अस्पताल वनेगु वा वयेगु सवारीया समस्या ज्यनी’ प्रमुख शाक्यं धयादिल ।

राहत वितरण व जा नकेगु ज्या धाःसा आःयात आवश्यक मजूगु निष्कर्ष बैठकं पिकाःगु दु । वैठकं नागरिकया समस्या सुनुवाई यानाः समाधान यायेत टोल फ्रि नं. ११८० यात २४ घौ हे न्ह्याकेगु निर्णय नं याःगु दु ।

अथे हे, समुदाय स्तरय् सचेतना थकायेत शिक्षक परिचालन यायेगु, अक्सिजन थेरापीलिसेंया आइसोलेसन केन्द्र स्थापना यायेत ग्वाहालि यायेगु निर्णय नं जूगु दु ।

लिसें कोभिड १९ संक्रमित विपन्न परिवारया लागिं वासः न्यायेत अले मेगु व्यवस्थापकीय ज्याय् खर्च यायेत महानगरं तःधंगु वडायात १ लाख, दथुइया वडायात ७५ हजार व चीधंगु वडायात ५० हजार तका निकासा छ्वयेगु नं निर्णय नं जूगु दु ।

वैठक न्ह्यः जनस्वास्थ्य विभागं हलिमय् न्यनाच्वंगु कोभिड संक्रमणया निगूगु लहरया असर, नेपाल व येँय् महामारीया वृद्धिदर, रोग नियन्त्रणया लागिं विभागया ज्याझ्वःबारे प्रस्तुतिकरण ब्यूगु खः ।