टी–ट्वेन्टी क्रिकेट उपाधि नितिं थौं नेपाल व नेदरल्याण्ड्स म्हितीगु
लहानान्युज | चौलाथ्व द्धादशी ११४१,बैसाख ११ सनिवाः
![](https://www.lahananews.com/sites/default/files/nepalvsnetherland.jpg)
येँय् न्ह्यानाच्वंगु त्रिकोणत्मक टी–ट्वेन्टी क्रिकेट श्रृंखलाया फाइनलय् थौं नेपालं नेदरल्याण्ड्सलिसे म्हितेत्यंगु दु ।
न्ह्यानाच्वंगु धेंधें बल्लाखय् नेपाल व नेदरल्याण्ड्सया थ्व स्वंगूगु कासा खः । थ्वयां न्ह्यः, लिग चरणया न्हापांगु कासाय् नेपाल त्याःगु खःसा निगूगु कासा नेदरल्याण्ड्सं त्याकूगु खः ।
थौंया कासा निगुलिं टोलीया लागिं वास्तविक परिक्षा जुइ । कासा किपूस्थित टियू ख्यलय् न्हिनय् जःछि पाः निताः इलय् न्ह्याइ । कोरोना महामारी धुंकाः न्हापांगु अन्तराष्ट्रिय धेंधेंबल्लाःया फाइनल म्हितेत्यंग्ु नेपाल उपाधि त्याकेगु आज्जुइ दु । नेपालं आःतक्क निगू टी–ट्वेन्टी श्रृंखला त्याकूगु दु ।
२०१९य् युएईस जूगु टी–ट्वेन्टी सिरिजय् नेपालं युएईयात २–१ बुकूगु खः । मलेसियाय् व हे दँय् जूगु सिरिज नेपालं २–० क्लिनस्वीप याःगु खः । त्रिकोणात्मक टी–ट्वेन्टी सिरिज धाःसा नेपालं आःतक्क त्याकेमफुनि ।
२०१९ य् सिंगापुरय् जूगु जिम्बाब्बे व सिंगापुर दुथ्याःगु ट्राई सिरिजय् नेपाल ल्यू लाःगु खः । नेपाल व नेदरल्याण्डस दथुइ आःतक्क १० कासा जूगु दु । गुकीमध्ये ३ कासाय् नेपाल त्याःगु खःसा नेदरल्याण्ड्सं ६ कासा त्याकूगु दु ।
छगू कासाय् धाःसा लिच्वः पिहांमवःगु खः ।
Categorized in कासा