नेवाः कलाकार मैत्रीपूर्ण फुटसल क्वचाल
लहनान्यूज | तछलाथ्व नवमि ११३७ (जुन ३ २०१७)
![](https://www.lahananews.com/sites/default/files/futsal2_0.jpg)
सुखावति मल्टि प्रोडक्सनया ग्वसालय् जूगु नेवाः कलाकारपिनिगु मैत्रीपूर्ण फुटसल कासाय् हुलाप्याखंमि मोहन व्यन्जनकारया पुचः न्हाप लाःगु दु ।
येँय् क्वचाःगु फुटसल कासाय् ल्यू धाःसा नांजाःम्ह हिरो धीरेन शाक्यया पुचः लात सा लियांल्यू राजभाइ सुवालया पुचः लात ।
अथे हे मिसा पुचःयागु कासाय् आशिष्मा नकःमि पुचः न्हाप लात सा भिन्तुना जोशीया पुचः ल्यू व पल्पसा डंगोलया पुचः लियांल्यू लात ।
कासाय् मिजं पुचलय् च्यागू टिम व मिसा पुचलय् प्यंगू टिमया ब्वति दुगु खः । कासाय् संकिपा लिसें संगीत ख्यलय् आवद्ध नेवाः कलाकारपिनिगु ब्वति दुगु खः ।
![](http://www.lahananews.com/sites/default/files/pictures/futsal1.jpg)
कासा क्वचायेधुंकाः सांगितिक ज्याझ्वः नं जूगु खःसा उगु हे ज्याझ्वलय् त्याःगु पुचःयात मेडल व दसिपौ लःल्हाःगु खः ।
उगु हे ज्याझ्वलय् सुखावति मल्टि प्रोडक्सनया ब्यानरय् दयेकेत्यंगु दक्कले न्हापांगु संकिपा जेन्टलम्यानया नं घोषणा जूगु दु ।
ज्याझ्वलय् वरिष्ठ सिने पत्रकार विजयरत्न असंबरे व संकिपा वितरक गोपाल कायस्थं पोष्टर उलेज्या यानाः संकिपाया घोषणा यानाद्यूगु खः ।
![](http://www.lahananews.com/sites/default/files/pictures/futsal_0.jpg)
संकिपा घोषणा धुंकाः संकिपाया कलाकारपिनिगु म्हसिका नं जूगु खः ।
सांगितिक ज्याझ्वलय् सुलिन्द्र शाक्य, माणिक शाहि, भीम तुलाधर, सुरज साय्मि, अन्जन श्रेष्ठ लिसेंयापिं कलाकारपिन्सं थःथःथु म्ये न्ह्यब्वयादीगु खः ।
Categorized in कासा