सहकालया द्यः जनबहाःद्यःया जात्रा न्ह्यात
राम डंगोल | चौलाथ्व अष्टमी, ११४१, वैशाख ७ मंगलबाः
कोरोना संक्रमणया जोखिम अप्वःसां वा व सहकालया द्यः जनबहाः द्यःया रथयात्रा थौंनिसें येँय् न्ह्याःगु दु ।
रथयात्राया याये न्ह्यः येँया जनबहालं द्यःयात खतय् तयाः दरबारमार्गया तीनधारा पाठशाला न्ह्यःने दूगु रथय् विराजमान याना सांस्कृतिक बांजलिसें रथ यात्रा यात । तीनधारा पाठशालां न्ह्यःनं सालाः रत्नपार्क, भोताहिति जुयाः असनय् थ्यंकूगु दु । न्हापांगु दिं थांै थ्यंमथ्यं ७ ताः इलय् रथ असनय् थ्यनेधुंकाः याः न्यात । रथयात्राया निन्हूगु दिनय् धाःसा असनं वसन्तपुलिइ च्वंगु कालभैरव न्ह्यःने थ्यंकी । ३न्हूगु दिं वसन्तपुलिं लगमय् यंकाः जात्रा यायेगु परम्परा दु ।
३२कू ताःहाकःगु रथ लगमय् याः न्यायेधुंकाः वयां कन्हय्कुन्हु रथं क्वकयाः खतय् तयाः बाजंगाजंलिसें जनबहालय् यंकाः जात्रा क्वचायेकेगु याइ । थ्वहे दथुइ जात्राय् दुथ्याइपिन्सं अनिवार्य मास्क तयेमाःगु व्यवस्था याःगु जनबहाः द्यः रथ व्यवस्थापन समितिया कजि नीलकाजी शाक्यं जानकारी बियादील । स्वास्थ्य सुरक्षाया सावधानी नालेत रथ सिवे्ं १५गू मिनेट न्ह्यः हे सांस्कृतिक बाजंया पुचःयात न्ह्याकेगु याःगु खः ।
छन्हू रथ सालिम्ह ल्याम्हसिनं मेगु दिं रथ सालेमबिइगु व्यवस्था नं याःगु दु । सांस्कृतिक ज्याखँयात निरन्तरता बिइत कोरोना महामारीपाखें तापायेगु माक्वः व्यवस्था यानागु समितिं जानकारी बिउगु दु । थगुने कोरोना महामारीं तापायेत लकडाउन न्ह्याकेधुंका जनबहाः द्ययःया रथयात्रा दिउगु खः । जनबहाः द्यःया रथयात नागराजया प्रतीक नालेगु याः । दँय्दसं थ्व जात्रा न्ह्याकेधुंका वाः वइगु धार्मिक भलसा दु ।
थ्वेह दथुई थौं चैते दसैं नखः नवदुर्गा भवानीया पूजा आराधना याना हनः । दँय्दसं चैत्र शुक्ल अष्टमीया दिं थुगु नखः हनावयाच्वंगु दु । हनुमानढोकाया मोहनि छेँय् घटस्थापना याना विधिवत् पूजा आराधना नापं अष्टमीया दिं बाँ स्याना देवदेवीयात पुज्याना थुगु नखः हन । चैते दसैंलय् अष्टमी व नवमीयात विशेष कथं हनावयाच्वंगु दु । अष्टमीया दिंयात चैते दसै व नवमीयात त्रेता युगय् अयोध्याया जुजु दशरथ व लानी कौशल्यावतीया जेठाम्ह काय्या कथं श्रीरामया जन्म जूगुलि रामनवमीया कथं हनेगु याः ।
