थुगुसिइया महामुर्ख उपाधि मह जोडियात
चिल्लाथ्व प्रतिपदा, ११४१ चैत्र १५ सोमबाः
थुगुसिइया महामुर्ख उपाधि मह जोडियात चूलाकुगु दु । होली नखःया लसताय् मिथिला नाट्य कला परिषदं ग्वसाःग्वःगु सम्मेलनय् प्याखँम्वः मदनकृष्ण श्रेष्ठ व हरिवंश आचार्ययात महामुर्खया उपाधि बिउगु खः ।
दँय्दसं ग्वसाःग्वयावःगु महामुर्ख सम्मेलनय् राजनीतिक छविया व्यक्तित्वया थुगु उपाधि बियावःगु जूसा नं थुगुसिइ धाःसा मह जोडीयात थुगु उपाधि बिउगु खः ।
ज्याझ्वस मदन कृष्ण श्रेष्ठं कला क्षेत्रय् दर्जनौ उपाधि चूलागु जूसां महामुर्खया उपाधि धाःसा ऐतिहासिक जूगु धयादील । हरिबंश आचार्यं धाःसा मनू न्हिइकेगु ज्यायात निरन्तरता बिइगु यानाम्ह थः मूर्ख जूगु धयादील ।
पटमुर्खया उपाधि धाःसा प्रदेश २ या भौतिक पुर्वाधार विकास मन्त्री जितेन्द्र सोनलयात बिउगु दु ।
रंगया पर्व होली, थौं तराईया जिल्लाय् हनाच्वंगु दु । सद्भाव व आत्मियता कालबिल यानाः हनीगु होली अर्थात फागुपुन्हि थौंकुन्हु तराईया जिल्लाय् हनीगु खः ।
वसन्त ऋतुया आगमनया सुरुवातय् लाइगु फागु पर्व थवंथवय् मैत्रीभाव प्वंकाः मंका कथं हनेगु चलन दु । सत्य युगय् विष्णुभक्त प्रल्हाद स्यायेत हिरण्यकश्यपं थीथी जुक्ती याःसां मफयेवं मिं तकं मथीगु अले मसीगु वरदान चूलाकाःम्ह केहेँ होलीकाया ग्वहालिं प्रल्हादयात स्यायेत कुतः याःगु धापू दु ।
होलीकां मुलय् तयाः मिंइ च्वंवंगु अवस्थाय् प्रल्हादयात छुं हे मजूगु बरु होलीका थः हे झौ जूगु प्रसंग थ्व पर्वनाप स्वाः । असत्ययात सत्यं त्याकूगु थ्व घटनालिपा होली पर्व हनेगु चलन न्ह्याःगु विश्वास यानातःगु दु ।
पहाडी क्षेत्रय् म्हिगः होली पर्व हंगु दुसा थौं तराईया जिल्लाय् हनाच्वंगु दु । नेपाल सरकारं भीडभाड मयासें होली पर्व हनेत इनाप याःगु दु ।
