त्रिदेशीय अन्तर्राष्ट्रिय फुटबल कासाय् बंगलादेशया विजयी शुरुआत
चिल्लाथ्व दशमी ११४१, चैत्र १० मंगलबाः
![](https://www.lahananews.com/sites/default/files/WhatsApp_Image_2021-03-23_at_17.51_.56_.jpg)
त्रिदेशीय अन्तर्राष्ट्रिय फुटबल धेँधेँबल्लाखय् बंगलादेशं विजयी शुरुआत याःगु दु ।
त्रिपुरेश्वरया दशरथ रंगशालाय् मंगलबाः सनिलय् जूगु मंगलबार उद्घाटन कासाय् कीर्गिस्तानया २३दँ क्वय्या टिमयात बुका बंगलादेशं जित हासिल याःगु खः । कीर्गिस्तानया कुमारवज उलु बैमानं ३०गू मिनेटय् याःगु आत्मघाती गोलं बंगलादेश त्याःगु खः ।
मोहमद साद उडिनया क्रस क्लियर यायेगु झ्वलय् वय्कलं थःगु हे पोष्टय् गोल याःगु खः । थ्व जित लिपा बंगलादेश फाइनलय् थ्यनिगु सम्भावना यात बल्लाकूगु दु । धेँधेँबल्लाया निगूगु कासा विहीबा नेपालं कीर्तिस्तानलिसे म्हितिइ । अथेहे चैत १४ गते शनिबाः नेपालया भिडन्त बंगलादेश लिसे जुई ।
राउण्ड रोबिन लिगया आधारय् जुयाच्वंगु धेँधेँबल्लाखय् न्हापांगु निगूगु लाइगु टिमं चैत १६ गते सोमबाः उपाधिया नितिं फाइनल कासा म्हितिइ । उपाधि विजेतां ५द्वः अमेरिकी डलर चुलाकिइ । थ्वहे दथुई कासा स्ववनिपिं स्वकूमिपिन्त मास्क व सेनिटाइजर अनिवार्य याःगु दु ।