अमेरिकी सेनाय् ज्या यानाच्वम्ह भरत सिंह पेलापाखें यल महानगरपालिकाया वडा ल्याः ९ वडा च्यासलय् च्वंगु श्री श्रमिक शान्ति माध्यमिक ब्वनेकुथिइ आखः ब्वनाच्वंपिं ब्वनामिपिन्त छगू ज्याझ्वः दथुइ थीथी सामाग्री बियाः ग्वाहालि याःगु दु ।

उगु ब्वनेकुथि जूगु ज्याझ्वलय् विद्यालय व्यवस्थापन दुजः राजु व्यञ्जनकारया मूपाहाँसुइ, प्रधानाध्यापक सानुलाल व्यञ्जनकार, सहायक प्रधानाध्यापक पवन विक्रम कार्की व शिक्षक प्रतिनिधि उद्धव प्रसाद तिमल्सिनाया सहभागी जूगु खः ।

ज्याझ्वलय् अनाथ, असहायलिसें आर्थिक स्थिति कमजोर जूपिं जेहेन्दार ब्वनामिपिं ल्यज्या यानाः छगू तगिंलिसें च्यागू तगिमय् आखः ब्वनाच्वंपिं मुक्कं नीन्याम्हेसित छगू छगू सेट स्कुल ड्रेस व दच्छितक गाक्क स्टेसनरी सामाग्री लःल्हाःगु खः।

ब्वनेकुथिइ च्यागू तगिंमय् आखः ब्वनाच्वंम्ह खुस्बु यादवया आर्थिक स्थिति अतिकं कमजोर जुगु हुनिं खुस्बुया हामापिसं आखः ब्वंकेगु त्वःतकेत्यंगु खबर सिया खुस्बुयात दच्छिया नितिं आखः ब्वंकेगु व्यवस्था लिसें मुक्कं नीखुम्ह विद्यार्थीपिन्त शैक्षिक सामाग्री लःल्हाःगु खः ।

Categorized in राष्ट्रिय