नेपाल सुपर लिग अक्सन जुइगु
चौलाथ्व षष्ठी ११४१, चैत्र ६ शुक्रवाः
नेपालय् न्हापांखुसिइ ग्वसाःग्वयेत्यंगु फ्रेन्चाइज फुटबल धेंधेंबल्ला ‘नेपाल सुपर लिग’ या कासामि न्यायेमिइगु अक्सन थौं जुइत्यंगु दु ।
ग्वसाःखलः नेपाल स्पोर्टस म्यानेजमेन्टं अक्सनय् सच्छि व ५८म्ह कासामियात दुथ्याकेगु न्ह्यथंगु दु । वैशाख ११ निसें २५ गते तक्क दशरथ रङ्गशालाय् जुइगु लिगय् ७ गू फ्रेन्चाइज टिमया ब्वति दुथ्यागु दु ।
थ्वहे दथुइ राष्ट्रिय फुटबल टिमया गोलकिपर विकेश कुथुयात काठमाडौं रेजर्सक्ल फुटबल बले मार्की कासामि दयेकुगु दु । अथेहे बालगोपाल महर्जन मुख्य प्रशिक्षक जूगु दु । येँया कार्यकारी निर्देशक विज्ञानराज शर्मा व विकेश लिसें बालगोपालनाप सम्झौता पौखय् ल्हाचिं तःगु खः ।
अथेहे मेम्ह फ्रेन्चाइज टिम धनगढी एफसीं मुख्य प्रशिक्षकय् नाइजेरियाली प्रशिक्षक तोपे अयोडेजी फुजायात अनुबन्धित याःगु दु । फुजाया हे नेतृत्वय् मनाङ मस्याङ्दी क्लबं २०७५ सालया सहिद स्मारक ‘ए’ डिभिजन लिगया उपाधि त्याकुगु खः ।
Categorized in कासा
