नायः ओलीया यःकति निर्णय लिपाः एमाले पार्टी भाँडभैलो
लहनान्युज | सिल्लागा चःह्रे ११४१, फागुन २८ शुक्रवाः
![](https://www.lahananews.com/sites/default/files/KP-Sharma-oli-1.jpg)
सर्वाेच्च अदालया पैmसला धुंका सत्तारुढ दल नेपाल कम्युनिष्ट पार्टी एमाले औपचारिक रुपं मूँज्याय् मच्वसें ल्वापू न्ह्याःगु दु ।
प्रधानमन्त्री लिसें एमालेया नायः तकं जुयादीम्ह केपी शर्मा ओलीं थः बल्लाकेत वरिष्ठ नेता माधव कुमार नेपाल व झलनाथ खनालपक्षपिन्त बाइपास याना न्ह्यावनेगु निर्णय यायेधुंका एमालेया ल्वापू तच्वइगु जूगु दु ।
शुक्रबाः बालुवाटारय थः पक्षया केन्द्रीय दुजः मूँज्या तया ओलीं यकति निर्णय याःगु खः । ओलीं नेता नेपाल पक्षयात छुं हे जानकारी व सहलह मयासे २३म्ह दुजः मनोनित याःगु दु । उगु मूँज्यां माओवादी केन्द्रया २३म्हसित केन्द्रीय दुजः दयेकूगु खः ।
अथेहे मूँज्यां माधव नेपाल विदेश विभाग प्रमुख जुयाच्वंगु लिछ्याना राजन भट्टराईयात नियुक्त याःगु खः । भट्टराई प्रधानमन्त्रीया परराष्ट्रय सल्लाहकार तकं जुयादी ।
अथेहे सुदूरपश्चिम प्रदेश इन्चार्जय् भीम रावलयात लिछ्याना लेखराज भट्टयात जिम्मेवारी बिउगु दु । मूँज्यां कर्णाली प्रदेश इन्चार्जय् युवराज ज्ञवालीया थासय् यमलाल कँडेलयात पदस्थापन याःगु दु ।
बागमती प्रदेश इन्चार्जय् नेपाल पक्षया अष्टलक्ष्मी शाक्यया थासय् ईश्वर पोरखेलयात जिम्मेवार बिउगु दु धाःसा प्रदेश १ या भीम आचार्ययात लिछ्याना सुवास नेम्वाङयात जिम्मेवारी बिउगु दु । मूँज्यां पार्टी प्रवक्ताया जिम्मेवारी प्रदीप ज्ञवालीयात बिउगु दु ।
आइतबाःया नितिं सःतुगु केन्द्रीय कमिटि मूँज्या न्ह्यः हे ओली पक्षं याःगु उगु निर्णयं धाःसा एमाले पार्टीया भविष्य गन वनिगु धैगु च्यूता अप्वःगु दु ।