श्री भगवती क्लबयात निगूगु जित
सिल्लागा सप्तमी ११४१, फागुन २१ शुक्रबाः
![](https://www.lahananews.com/sites/default/files/_MG_0711_1584358121.jpg)
शहीद स्मारक ‘बी’ डिभिजन लिग फुटबलय् श्री भगवती क्लबं निगूगु जित ल्हातय् लाकूगु दु ।
एन्फा मैदान सातदोबाटोय् म्हिगः जूगु कासाय् झम्सिखेल युथ क्लबयात ३–२ गोलं बुकाः श्री भगवतीं निगूगु जित ल्हातय् लाकूगु खः ।
श्री भगवतीयात त्याकेत आशिष श्रेष्ठ, नवराज गुरुङ व मोहन बहादुर थापा मगरं १–१ गोल यात । झम्सिखेलया मदन स्याङतान व अनिश चौधरीं १–१ गोल लितबिल ।
कासा त्याःगुलिसें श्री भगवती लिगया च्यागूगु थासय् थ्यंगु दु । श्री भगवतीं ९ कासापाखें ९ ल्याः मुंकूगु दु । झम्सिखेल ९ कासाय् ६ ल्याः मुंकाः ११ थासय् दु ।
अथे हे, निगूगु कासाय् रानीपोखरी कर्नर टिम आरसिटीं श्री कुमारी क्लबलिसे १–१ गोलया ज्वलिंज्वः म्हितूगु दु ।
स्वंगूगु मिनेटय् अजित गुरुङं गोल यासें आरसिटीयात अग्रता ब्यूगुलिइ २२ मिनेटय् युवराज राईं गोल यासें श्री कुमारीयात १–१ गोलया ज्वलिंज्वलय् लित हल ।
थुगु ज्वलिंज्वःलिसें आरसिटीं ९ कासापाखें १३ ल्याः मुंकाः न्यागूगु थासय् दु । श्री कुमारी ९ कासां ८ ल्याः मुंकाः ९गूगु थासय् दु ।
१२ टीमया ब्वति दुगु ‘बी’ डिभिजन लिग फुटबलय् ८ कासापाखें २२ ल्याः मुंकाः सातदोबाटो शीर्ष थासय् दु । ९ कासापाखें ज्वलिंज्वः ल्याः मुंकूगु खुमलटार निगूगु थासय् दु ।
लिग त्याकीगु क्लब ‘ए’ डिभिजनय् थहांवनी । दक्कले ल्यूने लाइगु टिम सी डिभिजनय् कुहांवनी ।
Categorized in कासा