चेल्सीया छगोलं लिभरपुल बुत
सिल्लागा सप्तमी ११४१, फागुन २१ शुक्रबाः
![](https://www.lahananews.com/sites/default/files/liv2.jpg)
इंग्लीश प्रिमियर लिग फुटबलय् साविक त्याकामि लिभरपुलयात चेल्सीं १–० गोलं बुकाब्यूगु दु ।
वंगु चान्हय् लिभरपुलया ख्यलय् जूगु कासाय् चेल्सीयात त्याकेत मेसन माउण्टं निर्णायक गोल यात ।
कासा त्याःगुलिसें चेल्सीं प्रिमियर लिगया शिर्ष प्यंगू दुने लायेगु सम्भावना बल्लाकूगु दु । बूगु टोली लिभरपुलया धाःसा शिर्ष प्यंगूया सम्भावना कमजोर जुयावंगु दु ।
थःगु हे मैदान एन्फील्डय् लिभरपुल लिपांगु ५ कासाय् बूगु दु । लिरभपुलं थःगु हे ख्यलय् थुलि कमजोर कासा क्यंगु क्लबया इतिहासय् हे न्हापांगु खुसी खः ।
प्रिमियर लिगया हे मेगु कासाय् वंगु चान्हय् टोटनह्याम हट्सपरं फुल्हमयात १–० बुकूबलय् एभर्टनं वेष्टब्रोमयात १–० गोलं हे बुकल ।
वंगु चान्हय्या कासात धुंकाः इंग्लीश प्रिमियर लिग फुटबलया ल्याः धलखय् २७ कासापाखें ६५ ल्याः मुंकूगु म्यान्चेस्टर सिटी शिर्ष थासय् यथावत दु ।
ज्वलिंज्वः कासापाखें ५१ ल्याः मुंकूगु म्यान्चेस्टर युनाईटेड निगूगु थासय् दुबलय् स्वंगूगु थाय्या लेष्टर सिटीया ५० ल्याः दु ।
४७ ल्याःलिसें चेल्सी प्यंगूगु अले ४६ ल्याः मुंकूगु एभर्टन न्यागूगु थासय् थहांवंगु दु ।
Categorized in कासा