थौं स्वांया पुन्हि, झःझः धायेक हन
लहनान्यूज | बछलाथ्व पुन्हि ११३७ (मे १० २०१७)
थौं बैसाख शुक्ल पुन्हि, अर्थात स्वांया पुन्हि, देयन्यंक थीथी ज्याझ्वः यानाः २५६१क्वःगु बुद्ध जयन्ती हंगु दु ।
शान्तिया दुत लिसें एशियाया तारा भगवान गौतम बुद्धया जीवनया स्वंगू महत्वपूर्ण घटना थौं हे चूलाःगु खः । सिद्धार्थया जन्म, बुद्धत्व प्राप्ति व महापरिनिर्वाण तकं बैसाख पुन्हिया दिनय् हे जुयाबिज्याःगु खः । जुजु शुद्धोधन व रानी मायादेवीया कोखं बूम्ह सिद्धार्थ २९दँ दुबलय परीवार व दरवार त्वःताः ज्ञान मालेत बिज्याःगु खः ।
खुदँ लिपा ३५दँ दुबलय् बैसाख पुन्हिया हे दिनय् भारतया बोधगयाय् वसपोलयात बुद्धत्व प्राप्ति जुल ।
बुद्ध जयन्ती हनेगु झ्वलय् गौतम बुद्धया जन्म जूगु थाय् लुम्बिनिइ नं उपराष्ट्रपति नन्दबहादुर पुनया उपस्थितीइ छगू ज्याझ्वः जुल ।
अथे हे येँया झीगु मंकाः खलःया ग्वसालय् येँया लाजिम्पाट लागाय् बुद्ध प्रतिमा जात्रा नं याःगु दु ।
व हे कथं बुद्ध जयन्तीया पाः काःगु स्वर्ण जयन्ती तकं हनाच्वंगु रत्नाकर महाविहार, हःखबहाः यलं नं थौं यलय् बुद्ध प्रतिमा जात्रा याःगु दु । हःखबहालं न्ह्याःगु र्यालीं यलया सायाः रुट चाःहिलाः हःखबहालय् थ्यंकाः क्वचाःगु खः ।
बुद्धं आर्य अष्टाङ्गिक मार्ग व पञ्चशीलया उपदेश बियाबिज्याःगु दु ।
आर्य अष्टाङ्गिक मार्गय् सम्यक दृष्टि, सम्यक संकल्प, सम्यक वचन, सम्यक कर्म, सम्यक जीविका, सम्यक व्यायाम, सम्यक स्मृति व सम्यक समाधि लाः ।
पञ्चशीलय् खुयामकाये, मखूगु खँ मल्हाये, यौन व्यभिचार मयाये, मद्यपान मयाये व हिंसा मयाये धइगु उपदेश दु ।
Categorized in राष्ट्रिय
